मुस्ताङ भन्सार कार्यालयबाट आज छुटेका दुईवटा सवारीसाधनमा ठूलो परिमाणमा भेप (इलेक्ट्रोनिक चुरोट) रहेको स्रोतको दाबीपछि उक्त भन्सार फेरि विवादमा तानिएको छ। विश्वसनीय स्रोतका अनुसार आज भन्सारबाट छुटेका दुई गाडीमा ठूलो मात्रामा भेप रहेको आशंका गरिएको छ। यद्यपि यसबारे सम्बन्धित निकायले औपचारिक पुष्टि गरिसकेको छैन।

बिज्ञापन

पछिल्लो समय मुस्ताङ भन्सार भौगोलिक विकटताको फाइदा उठाउँदै अवैध सामान ओसारपसार हुने संवेदनशील नाकाका रूपमा चिनिन थालेको छ। सीमावर्ती क्षेत्रमा निगरानी कमजोर हुँदा तस्करीका गतिविधि बढ्दै गएको भन्दै सरोकारवालाले पटक–पटक चिन्ता व्यक्त गर्दै आएका छन्।

बिज्ञापन

यस्तो अवस्थामा पनि भन्सार विभाग, अर्थ मन्त्रालय तथा प्रधानमन्त्री तथा मन्त्रिपरिषद्को कार्यालयले प्रभावकारी निगरानी र नियन्त्रणमा पर्याप्त सक्रियता नदेखाएको आरोप समेत उठ्न थालेको छ। तस्करी नियन्त्रणका लागि जिम्मेवार निकायहरू मौन बसेको भन्दै प्रश्नहरू उठिरहेका छन्।

यस विषयमा प्रतिक्रिया माग्दा भन्सार विभागका महानिर्देशक यामलाल भुसालले आफूलाई उक्त घटनाबारे तत्काल जानकारी नभएको बताए। उनले विषयको यथार्थ बुझ्ने र कुनै अनियमितता भेटिए कडा कारबाही प्रक्रिया अघि बढाइने बताएका छन्।

बिज्ञापन

कर्मचारी प्रेसले यसअघि पनि मुस्ताङ भन्सारसँग सम्बन्धित विभिन्न शंकास्पद गतिविधि र तस्करीका सम्भावित घटनाबारे पटक–पटक समाचार प्रकाशन गर्दै आएको छ। त्यसैले आज भन्सारबाट छुटेका सबै सवारीसाधनलाई तत्काल नियन्त्रणमा लिएर पुनः परीक्षण तथा विस्तृत अनुसन्धान गर्नुपर्ने माग समेत उठ्न थालेको छ।

सरोकारवालाहरूका अनुसार पछिल्लो समय राजस्व अनुसन्धान विभाग खारेज भएपछि संगठित तस्करी नियन्त्रणमा चुनौती थपिएको छ। अवैध व्यापार गर्ने समूहहरू अझ सक्रिय बन्दै गएको र सीमावर्ती नाकाहरूको दुरुपयोग बढेको उनीहरूको भनाइ छ।