सर्वाेच्च अदालतका लागि चार न्यायधीश सिफारिस भएका छन् । न्याय परिषद्को हिजो बसेको बैठकले उच्च अदालत पोखराका मुख्य न्यायाधीश डा रत्नबहादुर बागचन्द र उच्चका अन्य न्यायाधीशहरु चन्द्रबहादुर सारु, जनक पाण्डे र गोकर्ण डाँगी सर्वोच्चको न्यायाधीशका लागि सिफारिस गरेको हो ।

बिज्ञापन

वरिष्ठताक्रममा माथि रहेका उच्च अदालतका मुख्य न्यायाधीश र न्यायाधीशहरुलाई पछि पार्दै न्यायपरिषद् बैठकले एकजना मुख्यसहित चार न्यायाधीशलाई सर्वोच्च अदालतमा नियुक्तिका लागि सिफारिस गरेको हो । प्रधानन्यायाधीश मनोज शर्माको अध्यक्षतामा बसेको परिषद बैठकले चार न्यायाधीश सिफारिस गर्दा बरिष्ठतम् न्यायाधीशको हैसियतमा सदस्य रहेकी सपना मल्ल प्रधान र अर्का सदस्य महेशकुमार नेपालले निर्णयमा फरक मत लेखेका छन् । न्यायाधीशहरूको नाम सिफारिस गर्दा रोलक्रम मिचिएको र त्यसको आधार र औचित्य पुष्टि हुने कारणसमेत नदेखाइएको भन्दै उनीहरूले लिखित विमति जनाएका छन् । उच्चको न्यायाधीशमा रोलक्रममा पाँचौँ नम्बरमा रहेका चन्द्रप्रसाद सारु, तेह्रौं नम्बरका जनक पाण्डे र सोह्रौं नम्बरका गोकर्ण डाँगी सर्वोच्चको न्यायाधीशमा सिफारिस भएका छन् । सिन्धुपाल्चोक घर भई काठमाडौँमा पढेका र वकालतको क्रममा झापा पुगेका पाण्डे सभामुख डिपी अर्यालको निकट रहेको बताइन्छ । काँग्रेस नेता बालकृष्ण खाँणलाई भुटानी शरणार्थी प्रकरणमा उन्मुक्तिको आदेश दिएका उनलाई यसअघि पनि सर्वोच्चमा ल्याउन खोज्दा विवाद निकालिएको थियो । दाङका डाँगी सोही जिल्लाका सांसदसमेत रहेका रास्वपा महामन्त्री विपिनकुमार आचार्यको च्यानलबाट सिफारिसमा परेको हुनसक्ने चर्चा छ । दलित समुदायबाट बागचन पनि पहिलोपटक सर्वोच्चमा पुगेका छन् । उनी रोलक्रमको पहिलो नम्बरमा थिए ।