लोभले लाभ,लाभले विलाप भनेझै स्थिति आइलागेको छ गणेश महतोको लागि । केही महिना अगाडिमात्र लोकसेवाले लिएको सब इन्जिनियरको परीक्षामा उत्रिएर वैकल्पिकमा परेका उनै महतो नै सब इन्जिनियर प्रमोद कुमार यादव हत्याको मुख्य योजनाकार रहेको तथ्य प्रहरीहरुले सार्वजनिक गरेका छन् ।  प्रहरीले लोकसेवा आयोगको परीक्षामा वैकल्पिक उम्मेदवार रहेका व्यक्तिले नै स्थायी जागिर पाउने लोभमा मुख्य यादवको योजनाबद्ध हत्या गरेको अनुसन्धानमा संग्लग्न प्रहरीहरुले जनाएका छन् ।

बिज्ञापन

सब–इन्जिनियर प्रमोद कुमार यादव सिरहाको सुखीपुर नगरपालिका–९ बैशाखा घर भई मलंगवा नगरपालिका–१० मा डेरा गरी बस्दै आएका ३६ वर्षीय सब–इन्जिनियर प्रमोद कुमार यादवमाथि मिति २०८२ फागुन ३ गते राति करिब ७ ५५ बजे गोली प्रहार भएको थियो ।सोही प्रकरणमा जिल्ला प्रहरी कार्यालय सर्लाहीले हत्याका मुख्य योजनाकारसहित तीन जनालाई पक्राउ गरी सार्वजनिक गरेको हो । पक्राउ पर्नेहरूमा महोत्तरीको रामगोपालपुर नगरपालिका–५ घर भई हाल सर्लाहीको बरहथवा–९ शान्तिटोल बस्ने ३४ वर्षीय गणेश कुमार महतो, उनका साला नाता पर्ने २२ वर्षीय चन्द्रकिशोर सिंह कुशवाहा र आफ्नै भाइ २२ वर्षीय विजय कुमार महतो रहेका छन् ।