काभ्रेको रोशी गाउँपालिका-७ का वडा अध्यक्ष अशोककुमार गौतम पक्राउ परेका छन् । रोशी गाउँपालिका कटुञ्जेवेशीबाट रघुचौर खार्पाचोक चिसापानी वाईवाडाँडाहुँदै महाभारत गाउँपालिका आवतजावत गर्ने एकमात्र विकल्पको झोलुङे पुल बिक्री गरेको आरोपमा उनी पक्राउ परेका हुन् । उनले उक्त पुल कवाडीलाई गत वैशाख २५ गते २५ लाख रुपैयाँमा बिक्री गरेका थिए ।
बिज्ञापन
बिक्री गरेर आएको रकम उनले आफ्नै बैंक खातामा जम्मा गरेका थिए । उक्त बिषयमा स्थानीय मानर्दोजे तामाङसहितका स्थानीयले जिल्ला प्रहरी कार्यालय धुलिखेलमा आइतबार जाहेरी दिएपछि उनी पक्राउ परेको जिल्ला प्रहरी कार्यालय काभ्रेका डिएसपी मीनबहादुर घलेले जानकारी दिए । उनका अनुसार कवाड व्यवसायीहरुले वडाध्यक्षले पैसा बुझिसकेको बताएपछि गौतमलाई पनि पक्राउ गरिएको हो । ‘हामीले उनीहरुलाई समातेर सोधपुछ गर्दा वडाध्यक्षले बेचेको हो, पैसा पनि लिइसकेको छ भन्ने कुरा सुनाए’, डिएसपी घलेले भने, ‘राज्यको सम्पति वडाध्यक्षले नै बेचेको भनेपछि हामीले उनलाई पनि समातेका हौँ, आज म्याद थपेर अनुसन्धान अघि बढाउँदैछौँ ।’
बिज्ञापन
वडाध्यक्ष गौतमले कवडा व्यवसायीबाट कति पैसा लिए भन्नेबारे चाहीँ यकिन भइसकेको छैन । उता गाउँपालिका अध्यक्ष लामाले जनप्रतिनिधिबाट राज्यको सम्पति बेचिनु दुःखद भएको बताए । मुलुकी अपराधसंहिता २०७४ अनुसार झोलुंगे पुलको सामान चोरी तथा डाका सम्बन्धि कसुरअन्तर्गत अध्यक्ष गौतमलाई पक्राउ गरिएको हो । सार्वजनिक सम्पत्तिको संरक्षण र सुव्यवस्था कायम गर्नुको साटो वडा अध्यक्ष जस्तो व्यक्तिले खुलेआम सार्वजनिक सम्पत्ति बिक्रीमा सक्रिय भएपछि उनलाई पक्राउ गरिएको प्रहरीले जनाएको छ ।
बिज्ञापन
