काभ्रेको रोशी गाउँपालिका-७ का वडा अध्यक्ष अशोककुमार गौतम पक्राउ परेका छन् । रोशी गाउँपालिका कटुञ्जेवेशीबाट रघुचौर खार्पाचोक चिसापानी वाईवाडाँडाहुँदै महाभारत गाउँपालिका आवतजावत गर्ने एकमात्र विकल्पको झोलुङे पुल बिक्री गरेको आरोपमा उनी पक्राउ परेका हुन् । उनले उक्त पुल कवाडीलाई गत वैशाख २५ गते २५ लाख रुपैयाँमा बिक्री गरेका थिए ।

बिज्ञापन

बिक्री गरेर आएको रकम उनले आफ्नै बैंक खातामा जम्मा गरेका थिए । उक्त बिषयमा स्थानीय मानर्दोजे तामाङसहितका स्थानीयले जिल्ला प्रहरी कार्यालय धुलिखेलमा आइतबार जाहेरी दिएपछि उनी पक्राउ परेको जिल्ला प्रहरी कार्यालय काभ्रेका डिएसपी मीनबहादुर घलेले जानकारी दिए । उनका अनुसार कवाड व्यवसायीहरुले वडाध्यक्षले पैसा बुझिसकेको बताएपछि गौतमलाई पनि पक्राउ गरिएको हो । ‘हामीले उनीहरुलाई समातेर सोधपुछ गर्दा वडाध्यक्षले बेचेको हो, पैसा पनि लिइसकेको छ भन्ने कुरा सुनाए’, डिएसपी घलेले भने, ‘राज्यको सम्पति वडाध्यक्षले नै बेचेको भनेपछि हामीले उनलाई पनि समातेका हौँ, आज म्याद थपेर अनुसन्धान अघि बढाउँदैछौँ ।’