बिज्ञापन

बिज्ञापन

पोखरा–मालढुंगा सडक सञ्चालनमा आइसकेको छ। मालढुंगा–कालीगण्डकी पुल क्षेत्रमा बाढीले क्षति पुर्‍याएको भागमा सडकको भराइ तथा तटबन्ध निर्माणको काम भइरहेको छ। उक्त स्थानमा जालीको बोरामा ढुंगा तथा माटो भरेर सडकको संरचना तयार पार्ने काम भइरहेको छ। हालसम्म करिब ८ सय जालीका बोरा भरिसकिएको र काम निरन्तर अघि बढेमा सात दिनभित्र उक्त खण्ड पूर्ण रूपमा सञ्चालनमा ल्याउन सकिने विभागले जनाएको छ।

मालढुंगा–बेनी सडक पनि सञ्चालनमा आइसकेको छ। बेनी–गलेश्वर सडक तथा गलेश्वर–बैसरी सडक खण्डसमेत सञ्चालनमा रहेका छन्। करिब ८ किलोमिटर लामो गलेश्वर–बैसरी खण्डमा तीन स्थानमा ठूला पहिरो गएकोमा दुई स्थानको पहिरो हटाइसकिएको छ। एउटा ठूलो पहिरो भने अझै सफा गर्न बाँकी रहेको छ।

कुइनेटामा करिब एक सय मिटर सडक बगाएको अवस्थामा रहेको छ। बैसरीमा गएको पहिरोबाट आएको सामग्री प्रयोग गरी उक्त स्थानमा सडकको भाग भर्ने तयारी गरिएको छ। त्यसैगरी बेगखोलामा रहेका पाँच पहिरोमध्ये चारवटा हटाइसकिएको छ भने महभीरमा गएको पहिरो हटाउने काम बाँकी रहेको छ। रातापानीमा गएको पहिरो भने हटाइसकिएको विभागले जनाएको छ।

पोखरेबगरमा भने पुलको पहुँचमार्ग निर्माण गर्नुपर्ने अवस्था रहेको छ। तातोपानीभन्दा माथिल्लो क्षेत्रमा सडकको बाटो खुलिसकेको छ। उक्त क्षेत्रमा मात्रै करिब २० वटा पहिरो हटाएर सडकको बाटो खोलिएको छ। यद्यपि यातायात पूर्ण रूपमा सञ्चालन गर्न अझै करिब १३ किलोमिटर सडक खण्डमा काम गर्न बाँकी रहेको छ।

सडक खुलाउने कामलाई तीव्रता दिन दुई वटा ड्रोनमार्फत करिब ८० लिटर डिजेल आपूर्ति भइरहेको छ। आवश्यक इन्धन तथा निर्माण सामग्रीको व्यवस्थापन गर्दै विभागले अवरुद्ध सडकलाई तत्काल सञ्चालनमा ल्याउने प्रयास गरिरहेको छ। मौसम तथा अन्य प्राविधिक समस्या नआएमा बाँकी काम सम्पन्न गरी पाँच दिनभित्र उक्त सडक खण्डमा यातायात सञ्चालन गर्ने लक्ष्य राखिएको छ।

फिल्डमा खटिएका प्राविधिक प्रमुख इन्जिनियर नरेन्द्र सुवेदी र योजना प्रमुख तेजस्वी शर्माका अनुसार अवरुद्ध स्थानमा आवश्यक उपकरण तथा जनशक्ति परिचालन गरी काम भइरहेको छ। सडक विभागले मुख्य राजमार्गमा यातायात सहज बनाउने गरी प्राथमिकताका आधारमा अवरोध हटाउने कामलाई अघि बढाएको जनाएको छ।

यसैबीच काठमाडौँ उपत्यका भित्रिने तथा बाहिरिने प्रमुख सडकहरू भने अधिकांश सञ्चालनमा रहेका छन्। पृथ्वी राजमार्ग, बिपी राजमार्ग, कान्ति राजमार्ग, त्रिभुवन राजपथ तथा कुलेखानी–भीमफेदी सडक दुईतर्फी रूपमा सञ्चालनमा रहेका छन्।

तर बाढी तथा पहिरोका कारण केही महत्वपूर्ण सडक खण्डमा अझै अवरोध कायमै छ। रसुवाको बेत्रावती–धुन्चे सडक खण्डमा बाढीले क्षति पुर्‍याएपछि त्यहाँ नयाँ धातुको पुल निर्माणको काम भइरहेको छ। त्यसैगरी मुस्ताङको गलेश्वर–जोमसोम सडक खण्डमा पनि बाढी तथा पहिरोका कारण सडक पूर्ण रूपमा सहज हुन सकेको छैन।

सडक विभागले अवरुद्ध सडकलाई प्राथमिकताका आधारमा सञ्चालनमा ल्याउँदै लगेको जनाएको छ। महानिर्देशक जैसी आफैँ प्रभावित क्षेत्रमा पुगेर प्राविधिक टोलीसँग समन्वय गर्दै सडक खुलाउने कामको अनुगमन गरिरहेकाले अवरुद्ध सडकमा कामले तीव्रता पाएको विभागका अधिकारीहरूको भनाइ छ।