संघीय मामिला तथा सामान्य प्रशासनमन्त्री प्रतिभा रावलले विधेयक बिहीबार संसद्‍मा दर्ता गराएसँगै निजामती विद्येयक अध्यादेशको त्रास सकिएको विश्लेषण गरिएको थियो । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले संघीय निजामती सेवासम्बन्धी कानुनलाई संशोधन र एकीकरण गर्न बनेको विधेयक दर्ताका लागि प्रतिनिधिसभामा लगेकी थिइन ।

बिज्ञापन

यद्यपि प्रतिनिधि सभाको शुक्रबारको बैठकमा पेस नहुने भएपछि विद्येयक संसदमै थन्कने भएको छ । सभामुख डोलप्रसाद अर्याल र संघीय संसद् सचिवालयका महासचिव पद्मप्रसाद पाण्डे विदेश भ्रमणमा जानुपर्ने भएका कारण १६ असोजको मध्यरातदेखि चालु बजेट अधिवेशन अन्त्य हुँदैछ । सभामुख अर्याल, महासचिव पाण्डेसहितको टोली अन्तर व्यवस्थापिका संघ (आइपीयु)को बैठकमा सहभागी हुन तान्जिनिया जाने कार्यक्रम तय भएसँगै संसद अधिवेशन अन्त्य हुँदैछ । यता संसदमा दर्ता भएको संघीय निजामती सेवा विद्येयक त्यसै थन्किने भएको छ । शुक्रबारको प्रतिनिधि सभाको बैठकको कार्यसूचीमा संघीय निजामती विधेयक कार्यसूचीमा छैन । अब यो विद्येयक हिँउदे अधिवेशनमा मात्र अगाडि बढ्ने छ ।विधेयक संसद्मा दर्ता भएको भए पनि संसदमा पेश भएको छैन । आजै रातीदेखि संसद् अधिवेशन अन्त्य हुँदै छ । त्यसैले अर्को अधिवेशनको बैठकमा मात्र विद्येयक प्रस्तुत हुन्छ । संसदीय प्रक्रियाबाटै अगाडि बढ्दा कम्तिमा वैशाख महिना लाग्ने संसद सचिवालयका अधिकारीहरु बताउँछन् । संसदका कर्मचारीहरुका अनुसार प्रतिनिधि सभामा पेश भएर राज्य व्यवस्था तथा सुशसान समितिले छलफल पछि राष्ट्रिय सभामा पारित भएर पुन प्रतिनिधिसभाले पारित गर्नुपर्छ । राष्ट्रपतिले प्रमाणीकरण गरेपछि कानुनी चक्र पूरा गरे पछि मात्र बल्ल संघीय निजामती सेवा विद्येयक ऐनको रुपमा लागू हुन्छ ।