देवघाटस्थित नारायणी नदीको जलसतह खतरा तह पार गरेको मौसम विज्ञान विभागले जनाएको छ । नारायणीमा ७ दशमलव ३ मिटर पुगेपछि चेतावनी तह पार हुनेमा अहिले जलसतह निरन्तर बढिरहेको छ । देवघाटमा नारायणी नदीको खतरा तह ९ दशमलव ३ मिटर रहेकोमा जलसतह सो तह पार गरिसकेको विभागले जनाएको छ । जलसतह बढेसँगै नदी आसपासका तल्लो क्षेत्रमा कटान तथा डुबानको जोखिम बढेको छ।

बिज्ञापन

भरतपुर महानगरपालिका–१७ र २८ का नदी तटीय क्षेत्रका केही बस्तीमा पानी पस्न थालेको छ। हालको पूर्वानुमानअनुसार नारायणीको जलसतह ऐतिहासिक अधिकतम ११ दशमलव ६ मिटरभन्दा माथि पुग्न सक्ने तथा करिब १३ मिटर सम्म पुग्ने सम्भावना रहेको छ । नारायणीमा बाढी बढेसँगै पश्चिम चितवनका बस्तीमा बाढी पस्ने सम्भावना बढेको छ । प्रहरीले नदी तटीय क्षेत्रका बासिन्दालाई सतर्क रहन आग्रह गरिरहेको छ ।