संघीय मामिला तथा सामान्य प्रशासन मन्त्रालयले गरेको सरुवामा कतिसम्म गडबडी देखिदैंछन् भन्ने अर्काे उदाहरण पनि सार्वजनिक भएको छ ।
संघीय सरकारले स्थानीय तहमा समायोजन भएका कर्मचारीको समेत सरुवा गरिदिएको पाइएको छ । स्थानीय तहमा समायोजन भएका कर्मचारीको अन्तर स्थानीय तह मात्र सरुवा हुने प्रावधान छ । स्थानीय तहमा समायोजन भएका कर्मचारीको अन्य प्रदेशमा समेत सरुवा हुन सक्दैनन् । एउटा स्थानीय तहबाट अर्काे स्थानीय तहमा सरुवा हुनका लागि समेत दोहोरो सहमतिको प्रावधान राखिएको छ ।तर तिनै खरिदारलाई संघीय मामिला तथा सामान्य प्रशासन मन्त्रालयले गृहमा सरुवा गरेर हालैमात्र जिल्ला प्रशासन कार्यालय सल्यानमा खटाएको भेटिएको छ ।
बिज्ञापन
गृह मन्त्रालयले गत असोज २ मा राजपत्रअनंकित तहका ७० जना कर्मचारीहरुको सरुवा गरेको थियो । सूची अनुसार,नासु तहका चार जना,कम्युटर अपरेटर २० र ४६ जना खरिदार तहका कर्मचारी रहेका छन् । जुन सूचीको ३३ औं नम्बरमा हेमन्त प्रकाश बस्नेतको नाम रहेको छ । कर्मचारी संकेत नम्बर २२८८९१ रहेका उनी केही अगाडि मात्र स्थानीय तहमा समायोजन भएका कर्मचारी हुन । उनैलाई गृह प्रशासनले जिल्ला प्रशासन कार्यालय सल्यानमा पदस्थापन गरेको हो । बस्नेत स्थानीय तहमा समायोजन भइ सल्यानको बागचौर नगरपालिका वडा नम्बर १ का सचिवका रुपमा कार्यरत रहेको अबस्थामा संघीय मामिला मन्त्रालयले सरुवा गरेको थियो । जबकी उनी केही वर्षअघि समायोजन भएर संघीयबाट स्थानीय तहमा गएका पुगेका हुन ।
बिज्ञापन
उनको सरुवा बारे जिज्ञासा राख्दा भने, ‘मन्त्रालयले सरुवाको फर्म खुलाएको रहेछ । मैले पनि भरेँको हुँ । यस अघि स्थानीय तहमा समायोजन भएकाले पुनः संघमा फर्कन मिल्ने भनिएको थियो । यसबीचमा मेरो बढुवा पनि भएको छैन । संघीय कर्मचारीमा फर्कन मिल्ने होला भनेर फर्म भरेको हुँ । अहिले पुनः स्थानीय तहमा राखिदिन,सरुवा रद्ध गरिदिन मन्त्रालयमा निवेदन दिएको छु ।’
बागचौर नगरपालिकाका प्रमुख प्रशासकीय अधिकृत टंकबहादुर भट्टराईले ‘यो बिषय आफूले पनि सुनेको तर आधिकारिक पत्र प्राप्त नभएको जनाए । स्थानीय तहमा समायोजन भएका कर्मचारी,संघ सरकारले कसरी,के आधारमा सरुवा गरेको हो हामीलाई भन्दा संघीय मामिला मन्त्रालयलाई थाहा हुन्छ,उतै सोध्नु ।’
