काठमाडौंको डिल्लीबजारस्थित नापी कार्यालयमा कार्यरत नापी अधिकृत डिल्लीबहादुर वली ९ लाख घुससहित पक्राउ परेका छन् । अधिकृत वलीलाई सेवाग्राहीबाट घुस लिइसकेको टोखा नगरपालिका ५ वसुन्धरा चोकस्थित एक रेस्टुरेन्टबाट नियन्त्रणमा लिइएको र आज विशेष अदालताबाट अनुसन्धानका लागि म्याद थपिएको अख्तियारले जनाएको छ । कार्यालयअन्तर्गत ३ नम्बर नापी टोली माछापोखरीका प्रमुखसमेत रहेका उनलाई अख्तियार दुरुपयोग अनुसन्धान आयोगले नौ लाख रुपैयाँ घुससहित हिजो समातेको जनाएको छ ।
अख्तियारको अभियोगपत्र अनुसार,वलीले छुट जग्गा दर्ता सिफारिससहितको मिसिल पत्र भूमि प्रशासन कार्यालय मनमैजु, काठमाडौंमा पठाउनका लागि सेवाग्राहीलाई अनावश्यक दुःख, हैरानी र सास्ती दिँदै घुस माग मागेको उजुरीका आधारमा टंगालबाट खटिएको टोलीले उनलाई टोखा नगरपालिका–५, वसुन्धारा चोकस्थित एक रेष्टुरेन्टबाट नियन्त्रणमा लिएको जनाइएको छ ।
बिज्ञापन
उनीमाथि घुस–रिसवत लिई भ्रष्टाचार गरेकोसम्बन्धी कसुरमा विशेष अदालतबाट म्याद थप अनुमति लिई थप अनुसन्धान भइरहेको अख्तियारले बताएको छ ।
