त्रिभुवन अन्तर्राष्ट्रिय विमानस्थलबाट नेपाल वायुसेवा निगमका दुई जना कर्मचारी पक्राउ परेका छन् । मलेसिया हिँडेका नेवानीका २ कर्मचारीलाई प्रहरीले एयरपोर्टबाटै पक्राउ गरेको हो । पक्राउ पर्नेमा काठमाडौँ–२६ बस्ने ५४ वर्षीया जननी बज्राचार्य र गोरखा नगरपालिका–३ बस्ने ३५ वर्षीया ममता पाण्डे रहेका छन् ।
बिज्ञापन
पक्राउ परेको दुबै कर्मचारीहरु आर्थिक प्रशासन विभागमा कार्यरत छन् । पक्राउ परेका कर्मचारीहरुबाट अमेरिकी डलर ४३०० र पाण्डेबाट ४२०० बरामद भएको छ । तोकिएको भन्दा धेरै विदेशी मुद्रा बोकेर उनीहरू मलेसिया जान लागेको भेटिएको छ । राष्ट्र बैङ्कको मापदण्ड अनुसार ५ हजार डलर भन्दा धेरै विदेशी मुद्रा लैजान पाइँदैन । प्रहरीले बज्राचार्यको साथबाट १२ हजार ३ सय ७२ मलेसियन रिंगेट र ४ हजार ३ सय अमेरिकी डलर बरामद गरेको छ । पाण्डेको साथबाट प्रहरीले ४२ सय अमेरिकी डलर र १२ हजार ३२८ रिंगेट बरामद गरेको छ ।
थप अनुसन्धानका लागि उनीहरूलाई सम्पत्ति शुद्धीकरण अनुसन्धान विभाग पठाइएको प्रहरीले जनाएको छ ।
