अबदेखि नेपाल प्रहरीले पनि १५-१५ दिनमा नै तलब पाउने भएको छ ।
बिज्ञापन
प्रहरी प्रधान कार्यालयले एक सर्कुलर जारी गर्दै निजामती कर्मचारीहरुलाई झैं प्रहरीहरुलाई पनि अर्धमासिक रुपमा तलबभत्ता भुक्तानी गर्न भनेको छ । प्रहरी प्रधान कार्यालयले मातहतका कार्यालयहरूलाई परिपत्र गर्दै आगामी आर्थिक वर्ष २०८३/ ८४ देखि उक्त व्यवस्था कार्यान्वयन गर्न निर्देशन दिएको हो। नेपाल प्रहरी प्रधान कार्यालय कल्याण महाशाखालाई समेत आवश्यक वित्तीय प्रणालीहरू सोहीअनुसार व्यवस्थापन गर्न निर्देशन दिइएको छ।
बिज्ञापन
यस अघि गत वैशाखदेखि निजामती कर्मचारीहरुले १५ दिनको तलब प्राप्त गर्न थालेका छन् । हाल सङ्घीय निजामती कर्मचारीमा सीमित यो व्यवस्था क्रमशः सबै सरकारी वेतनधारीमा विस्तार गरिने योजना अनुसार अब प्रहरीहरुले पनि महिनामा दुई पटक तलब पाउने भएका हुन । गत वैशाख ४ गते अर्थमन्त्री डा वाग्लेले १५ दिनमै तलब भुक्तानी गर्ने व्यवस्था पाइलट परियोजनाका रूपमा अघि बढाउने निर्णय गरेका थिए। सोही निर्णय अनुसार कर्मचारीहरुले मासिक रुपमा दुई पटक तलब पाउने गरेकोमा अब प्रहरी प्रधान कार्यालयले समेत प्रहरीहरुलाई महिनामा दुई पटक तलब भुक्तान गर्ने भएको हो ।
प्रहरी मुख्यालयले जारी गरेको पत्रअनुसार अर्थ मन्त्रालयको निर्णय तथा महालेखा नियन्त्रक कार्यालयको पत्राचारका आधारमा राष्ट्रसेवक कर्मचारीलाई अर्धमासिक रूपमा तलब-भत्ता भुक्तानी गर्ने व्यवस्था लागू गरिएको हो। यसअनुसार कर्मचारीहरूले एकैपटक मासिक तलब पाउने सट्टा प्रत्येक १५ दिनको अन्तरालमा तलब प्राप्त गर्नेछन्।
