अर्थ मन्त्रालयले फागुन महिनामा ५ अर्ब ६७ करोड २३ लाख रुपैयाँ बराबरको आर्थिक सहायता, थप निकासा, रकमान्तर तथा स्रोत सहमति दिएको छ । अर्थ मन्त्रालयका विवरण अनुसार भौतिक पूर्वाधार तथा यातायात मन्त्रालय र सहरी विकास मन्त्रालय अन्तर्गका आयोजनमा सबैभन्दा बढी रकमान्तर गएको भेटिएको छ ।

बिज्ञापन

फागुन महिनामा सरकारले २५ लाख आर्थिक सहायता, २ अर्ब ३८ करोड थप निकासा तथा ३ अर्ब २८ करोड रुपैयाँ बराबरको बजेट रकमान्तर गरेको अर्थ मन्त्रालयले जनाएको छ । यस्तै थप बजेट निकासा विभिन्न ४६ वटा आयोजनाको लागि भएको छ । यस्तो रकम २ अर्ब ३८ करोड रुपैयाँ रहेको छ । अर्थ मन्त्रालयले प्रशासनिक र चालू आयोजनाका लागि ४६ शीर्षकमा २ अर्ब ३८ करोड ७ लाख ४९ हजार रुपैयाँ निकासा गरेको हो । फागुन महिनामा पुँजीगततर्फ १ करोडभन्दा बढीको एक बजेट उपशीर्षकबाट अर्को बजेट उपशीर्षकमा रकमान्तर ३ अर्ब २८ करोड ९० लाख ५१ हजार रुपैयाँ भएको छ । अर्थले ५८ शीर्षकमा रकमान्तर गरेको छ । ज्यापु संस्कृति विकास कोषलाई १० लाख तथा नेपाल संवद् न्हूदँ राष्ट्रिय संरक्षण समाजलाई १५ लाख रुपैयाँ सहायत प्रदान गरेको अर्थले जनाएको छ । फागुन महिनामा सबैभन्दा बढी राजमार्ग स्तरोन्नति तथा पुनस्र्थापना कार्यक्रमका लागि १ अर्ब ३२ करोड रुपैयाँ रकमान्तर गरी निकासा गरिएको छ । महाकाली करिडोरको नयाँ ट्रयाक निर्माण गर्न ५० करोड, रणनीतिक सडक पुल तथा निर्माण तथा पुल पुलेसा संरक्षणका लागि १९ करोड १ लाख रुपैयाँ रकमान्तर भएको छ । कान्तिराजपथ स्तरोन्नति गर्न २५ करोड ५ लाख रकमान्तर भएको छ ।