संघीय निजामती सेवा विधेयक प्रतिनिधिसभामा आज दर्ता हुने बताइएको छ । प्रधानमन्त्री पुष्पकमल दाहालले यस्तो बताएका हुन । हिजो लुम्बिनी प्रदेशसभा बैठकलाई सम्बोधन गर्दै उनले संघीय निजामती सेवा विधेयक सम्भवतः आइतवार दर्ता हुने बताएका हुन । यस्तै प्रधानमन्त्री प्रचण्डले प्रहरी ऐन यसै अधिवेशनमा प्रस्तुत हुने जनाएका हुन ।
मुलुक संघीयतामा गएको आठ बर्ष व्यतित भइसक्दा समेत संविधान पछिको दोश्रो कानुन मानिएको संघीय निजामती सेवा ऐन आउन सकेको छैन । झण्डै आठ महिनासम्म प्रधानमन्त्री तथा मन्त्रिपरिषद्को घर्रामा थन्काइएको विद्येयक आज प्रतिनिधिसभामा दर्ता गरिन लागेको हो ।

बिज्ञापन

प्रधानमन्त्री प्रचण्डले आगामी दिनमा संघीयता कार्यान्वयन, विकास र सेवा प्रवाहमा उत्कृष्ट काम गरेर संघीयता विरोधीहरूलाई व्यवहारले जवाफ दिने बताएका छन् । संघीय कानुनहरू निर्माणमा सरकार सक्रिय रूपमा लागिरहेको जानकारी दिँदै प्रधानमन्त्रीले शिक्षा ऐनको मस्यौदा संसदमा दर्ता भइसकेको, निजामती सेवा ऐन दर्ताको प्रक्रियामा रहेको र प्रहरी ऐन लगायतका अन्य ऐनहरू पनि छिट्टै संसदमा प्रस्तुत हुने दावी गरेका छन् ।