बिज्ञापन

बिज्ञापन

नयाँ मापदण्डमा कर्मचारीको गुनासो तथा कार्यसम्पादनलाई समेत सरुवाको आधार बनाइने भएको छ। कुनै कर्मचारीले आफ्नो कार्यस्थलका विषयमा जायज गुनासो राखेको अवस्थामा त्यसको सम्बोधन गर्ने तथा उत्कृष्ट र प्रशंसनीय काम गरेका कर्मचारीलाई उनीहरूको कार्यसम्पादनअनुसार विशेष जिम्मेवारी दिने व्यवस्था गरिने भएको छ।

कार्यसम्पादनमा अब्बल देखिएका कर्मचारीलाई सामान्य स्थानमा मात्रै सीमित नराखी चुनौतीपूर्ण र विशेष दायित्व भएका कार्यालयमा समेत खटाउने तयारी मन्त्रालयले गरेको छ। राम्रो कार्यसम्पादन गरेका कर्मचारीलाई चुनौतीपूर्ण जिम्मेवारी दिएर उनीहरूको क्षमता उपयोग गर्ने नीति मापदण्डमा समेटिने स्रोतले जनाएको छ।

त्यसैगरी, लामो समयदेखि उपत्यकाबाहिर कार्यरत कर्मचारीलाई आवश्यकताअनुसार उपत्यकामा ल्याउने र लामो समयदेखि उपत्यकामै बसेर सेवा गरिरहेका कर्मचारीलाई उपत्यकाबाहिर पठाउने व्यवस्था पनि मापदण्डमा समेटिएको छ। एउटै भौगोलिक क्षेत्रमा लामो समयसम्म कर्मचारी थुप्रिने अवस्था अन्त्य गर्दै कर्मचारी व्यवस्थापनमा सन्तुलन कायम गर्ने मन्त्रालयको तयारी छ।

सरुवालाई व्यवस्थित र पारदर्शी बनाउन कर्मचारीले सरुवाका लागि कम्तीमा तीनवटा र बढीमा पाँचवटा कार्यालय वा स्थानको विकल्प दिनुपर्ने व्यवस्था पनि गरिने भएको छ। कर्मचारीले रोजेको विकल्प, सेवा अवधि, कार्यसम्पादन तथा कार्यालयको आवश्यकतालाई आधार बनाएर सरुवा व्यवस्थापन गर्ने तयारी मन्त्रालयले गरेको हो।
मन्त्रालय स्रोतका अनुसार मापदण्ड स्वीकृत भएपछि ठूलो संख्यामा सिनियर डिभिजन इन्जिनियर तथा सुपरिटेन्डेन्ट इन्जिनियरसहित प्राविधिक कर्मचारीको सरुवा प्रक्रिया अघि बढ्नेछ। लामो समयदेखि सरुवाको प्रतीक्षामा रहेका कर्मचारीको व्यवस्थापन गर्न मापदण्ड स्वीकृतिलाई महत्वपूर्ण रूपमा हेरिएको छ।

मन्त्रालयले सरुवालाई पहुँच र दबाबका आधारमा नभई सेवा अवधि, कार्यसम्पादन, भौगोलिक सन्तुलन र कार्यालयको आवश्यकताका आधारमा व्यवस्थित गर्ने दाबी गरेको छ। तर मापदण्ड कार्यान्वयनका क्रममा राजनीतिक तथा प्रशासनिक दबाबलाई कसरी व्यवस्थापन गरिन्छ भन्ने विषय भने चुनौतीका रूपमा रहने देखिएको छ।