बिज्ञापन

बिज्ञापन

तत्कालका लागि सम्बन्धित संस्थानका परिसरबाटै उपभोक्तालाई खुला रूपमा खाद्य सामग्री बिक्री–वितरण गर्ने व्यवस्था मिलाइएको प्रशासनले जनाएको छ। सुपथ मूल्य पसलमार्फत स्टिम जिरा चामलमा प्रतिकेजी ५ रुपैयाँ तथा सोना मनसुली चामलमा प्रतिकेजी ५ रुपैयाँ छुट उपलब्ध गराइएको छ।

त्यसैगरी नुनको प्रत्येक प्याकेटमा २ रुपैयाँ छुट दिइएको छ भने चिनी प्रतिकेजी ११० रुपैयाँमा बिक्री–वितरण गरिनेछ। चाडपर्वको समयमा उपभोक्तामाथि पर्ने अतिरिक्त आर्थिक भार कम गर्न सरकारले सञ्चालन गरेको सुपथ मूल्य पसलबाट सर्वसाधारणले प्रत्यक्ष लाभ लिन सक्ने प्रशासनको अपेक्षा छ।

बजारमा चामल, चिनी, नुनलगायतका आधारभूत उपभोग्य वस्तुको अभाव हुन नदिन प्रशासनले आपूर्ति व्यवस्थालाई समेत व्यवस्थित बनाएको जनाएको छ। त्यसका लागि झापामा २५ वटाभन्दा बढी थोक विक्रेतामार्फत खाद्यान्नको नियमित आपूर्ति हुने व्यवस्था मिलाइएको छ।
चाडपर्वको समयमा माग बढ्ने भन्दै प्रशासनले बजारमा कृत्रिम अभाव सिर्जना गर्ने, अस्वाभाविक रूपमा मूल्य वृद्धि गर्ने वा उपभोक्तालाई ठगी गर्ने गतिविधिमाथि निगरानी बढाउने जनाएको छ। त्यस्ता गतिविधि गर्ने जो–कोहीमाथि प्रचलित कानुनअनुसार कडाइका साथ कारबाही अघि बढाइने प्रमुख जिल्ला अधिकारी पोखरेलले बताउनुभएको छ।

प्रशासनले सुपथ मूल्य पसल सञ्चालनसँगै निजी क्षेत्रलाई पनि उपभोक्तामैत्री व्यवहार गर्न आग्रह गरेको छ। जिल्ला प्रशासन कार्यालय झापाले जिल्लाका उद्योगी तथा व्यवसायीहरूलाई संस्थागत सामाजिक उत्तरदायित्वलाई आत्मसात् गर्दै स्वस्फूर्त रूपमा उपभोक्ताका लागि विशेष छुट तथा राहतका प्याकेज सार्वजनिक गर्न आह्वान गरेको छ।

चाडपर्वका बेला बजारमा उपभोग्य वस्तुको माग बढ्ने भएकाले सरकारी सुपथ मूल्य पसल, निजी क्षेत्रका छुट तथा नियमित बजार अनुगमनलाई प्रभावकारी बनाउन सके उपभोक्ताले राहत पाउने प्रशासनको विश्वास छ।