बिज्ञापन

बिज्ञापन

लाटीखोला, फर्शे, जुकेखोला र केरावारी क्षेत्रमा सडक माथिबाट लेदोसहितको पहिरो खसेको छ। लामाखेतमा कालिगण्डकी नदीको उच्च बहावका कारण सडक डुबानमा परेको छ। गलेश्वर, रघुगंगा पुल, बैसरीका विभिन्न स्थान तथा वेगखोलामा पहिरो खसेको कार्यालयले जनाएको छ। वेगखोलामा पहिरोसँगै कालिगण्डकी नदीको उच्च बहावका कारण सडक डुबानमा समेत परेको छ।

महभीरमा चट्टानसहितको पहिरो खसेको छ भने भिरकाटेमा कालिगण्डकी नदीको उच्च बहावले सडक कटान गरेको छ। पोखरेबगरमा पुलको बायाँतर्फको पहुँचमार्ग नै बगाएको छ। तातोपानी कुण्ड, नार्थ्याङ र खाम्भित्तामा समेत कालिगण्डकी नदीको उच्च बहावले सडक कटान गरेको कार्यालयको विवरणमा उल्लेख छ।

त्यस्तै नौनीबगरमा ढुंगासहितको पहिरो खसेको छ। जल्थले, सुकेबगर र दानालगायतका क्षेत्रमा लेदोसहितको पहिरो सडकमा खसेको छ। रुप्से, काभ्रेभिर, खहरेखोला, घासा र कैकुखोलामा सडक माथिबाट ढुंगा खसेपछि बाटो अवरुद्ध भएको छ। लेतेखोलामा समेत लेदोसहितको पहिरो खसेको कार्यालयले जनाएको छ।

बेनी–जोमसोम खण्ड पार गर्दै जोमसोम–कोरला खण्डतर्फ पनि वर्षाजन्य क्षतिको क्रम देखिएको छ। मार्फामा कल्भर्टमा माटो तथा ढुंगा थुप्रिएर पानीको बहाव अवरुद्ध हुँदा सडकबाट पानी बगेको छ। पाण्डाखोला, एकलेभट्टी, कागबेनी, तिरीगाउँ वारी, ग्रिन ताङ्ग्वे, ताङ्ग्वे खोल्साका विभिन्न स्थान तथा छुसाङ खोल्सामा लेदोसहितको पहिरो सडकमा खसेको छ।

घ्याकर खोलामा खोलाको बहावले सडक कटान गरेको छ भने चैलेमा भारी वर्षाका कारण सडक कटान भएको छ। समरखोला र झोखोलामा खोलाको बहावका कारण सडक कटान भएको कार्यालयले जनाएको छ। स्याङ्वोचे, घमी, चराङ, छोसेर र नेचुङ भन्सार घुम्ती क्षेत्रमा समेत सडक माथिबाट लेदोसहितको पहिरो खसेको विवरण कार्यालयले सार्वजनिक गरेको छ।

यसरी मालढुंगा–बेनी–जोमसोम–कोरला सडकखण्डका दर्जनौँ स्थानमा एकैपटक पहिरो, बाढी र सडक कटान हुँदा उत्तरी मुस्ताङतर्फको यातायात सञ्चालनमा चुनौती थपिएको छ। विशेषगरी कालिगण्डकी नदी तथा विभिन्न खोलामा आएको उच्च बहावका कारण सडकको संरचनामै क्षति पुगेकाले कतिपय स्थानमा तत्काल यातायात सञ्चालन गर्न कठिन अवस्था देखिएको छ।

सडक योजनाले भने उपलब्ध उपकरण तथा जनशक्तिको उच्चतम उपयोग गर्दै सडक खुलाउने र यातायात सञ्चालनलाई सहज बनाउने काम भइरहेको जनाएको छ। कार्यालयले अवरुद्ध तथा जोखिमयुक्त स्थानमा आवश्यक उपकरण परिचालन गरी आवागमन सहज बनाउनेतर्फ काम भइरहेको जानकारी दिएको छ।

सडक योजनाका अनुसार सार्वजनिक गरिएको क्षतिको विवरण असोज ११ गते दिउँसो १ बजेसम्मको अवस्था हो। वर्षा जारी रहेकाले थप क्षति हुन सक्ने सम्भावना रहेकाले सडक प्रयोग गर्दा अवस्थाबारे जानकारी लिएर मात्र यात्रा गर्नुपर्ने अवस्था देखिएको छ।