नक्कली प्रमाणपत्र पेस गरी बढुवा लिएको आरोपमा राष्ट्रिय अनुसन्धान विभागका अधिकृतविरुद्ध मुद्दा दायर भएको छ । अख्तियारले राष्ट्रिय अनुसन्धान विभागका प्रमुख अनुसन्धान अधिकृत ठाकुरप्रसाद केसीले शैक्षिक योग्यताको नक्कली प्रमाणपत्रका आडमा जागिर खाएको र सोही शैक्षिक प्रमाणपत्रका आधारमा पटक पटक बढुवा लिएको आरोपमा भ्रष्टाचार मुद्दा दायर भएको छ।

बिज्ञापन

राज्यका सुरक्षा निकायमा कार्यरत कर्मचारीहरूले सेवा प्रवेश र बढुवाका लागि नक्कली प्रमाणपत्र पेस गरेको भनी परेको उजुरीमाथि अनुसन्धान गर्दा केसीको शैक्षिक योग्यता झुट्टा पाइएको अख्तियारले जनाएको छ। केसी सहायक निरीक्षक हुँदै राष्ट्रिय अनुसन्धान विभागमा प्रवेश गरेका थिए । उनले नियुक्तिका बेला भारतको उत्तर प्रदेशस्थित बोर्ड अफ हाई स्कुल ऐण्ड इण्टरमिडिएट एजुकेशन युपीबाट जारी भएको हाईस्कुलको प्रमाणपत्र पेश गरेका थिए । अख्तियारका अनुसार केसीले सोही प्रमाणपत्र देखाएर २०६६ सालमा वरिष्ठ अनुसन्धान सहायक, २०७३ सालमा अनुसन्धान अधिकृत र पछिल्लो पटक २०८१ सालमा प्रमुख अनुसन्धान अधिकृत पदमा बढुवा भई नियमित हैसियत, तलब, भत्ता तथा अन्य सरकारी सुविधाहरू उपभोग गरेका थिए।