सुरक्षा निकायहरूमा वर्दीविहीन र तल्लो तहका कर्मचारीको आर्थिक रवाफवारे व्यापक चर्चा छ । उपल्लो तहका हाकिमसँगको उठबस, आर्थिक लेनदेन र निकटताले सीमा नाघेपछि सुरक्षा निकायका ठूला भनिएका हाकिमहरूसमेत सशंकित बनेका छन् । विशेषगरी ती निकायका एकाउण्टेण्ट र सहायक लेखापालको हैसियतले सबैलाई झस्काएको हो । अहिले सबैभन्दा धेरै चर्चा सशस्त्र प्रहरी बलका एकाउण्टेण्टहरूको हुन थालेको छ । त्यसका एक प्रतिनिधि पात्र हुन कल्पना गुरुङ ।
बिज्ञापन
जो सशस्त्र प्रहरी बल नेपालले कीर्तिपुरमा सञ्चालन गरेको एपीएफ स्कुलमा ६ बर्षदेखि एउटै पद अर्थात लेखा अधिकृतको रुपमा कार्यरत थिइन र ११ करोड रुपैयाँ हिनामिना गरेको आरोपमा हालै पक्राउ परेकी छिन् । साधरणतया प्रहरीका लेखा प्रमुखलाई बढीमा दुई वर्षमा सरुवा हुने प्रचलन भए पछि शक्तिकेन्द्रको आडमा गुरुङ भने झन्डै ६ वर्षसम्म त्यहाँबाट दायाँबायाँ हुन परेको थिएन । उनी शैलेन्द्र खनाल सशस्त्र प्रहरी महानिरीक्षक (आईजीपी) हुँदा सो स्कुलको लेखा सम्हाल्न पुगेकी थिएन । जिम्मेवारी सम्हाल्दा सशस्त्र प्रहरी नायव निरीक्षक (सई) थिइन । त्यहीँ बसेर सशस्त्र प्रहरी निरीक्षकमा बढुवा भइसकेकी छिन् । विगतमा कार्यदल र नम्बर २० गण सिनामंगलको समेत लेखा प्रमुखको जिम्मेवारी बहन गरिसकेकी गुरुङलाई लामो समयदेखि एउटै कार्यालय र काठमाडौं उपत्यकाभित्रै राखिएको भन्दै लेखा उपसमूहका अधिकृतहरूले आलोचना गर्दै आएका छन् । उनैले सशस्त्र प्रहरी बल स्कुलको पैसा आफ्नो खातामा हालेको बिषय उठान भए पछि सशस्त्र प्रहरीले कानुन शाखाका डीआइजी युवराज अर्यालको नेतृत्वमा सो सम्बन्धमा छानबिन समिति गठन गरेको थियो ।
बिज्ञापन
समितिको प्रतिवेदनका आधारमा कल्पनाले आफ्नो साथीको बैंक खातामा रकम ट्रान्सफर गरेर अपचलन गरेको उल्लेख छ । त्यसपछि केही समय रकम फिर्ताका लागि समय दिइए पनि रकम फिर्ता नभएपछि सशस्त्र प्रहरीकै पत्रका आधारमा इन्स्पेक्टर गुरुङ र रकम चलाउने लामालाई काठमाडौं प्रहरीले पक्राउ गरेको हो । गुरुङले विद्यालयको रकम सशस्त्र प्रहरी कल्याण कोषमा नपठाई पटक पटक व्यक्तिगत खातामा ट्रान्सफर गरेको प्रारम्भिक अनुसन्धानबाट खुलेको छ । ४ वर्षदेखि स्कुलको ११ करोड रुपैयाँ विभिन्न मितिहरूमा साथीको बैंक खातामा पठाएको खुलेको थियो । दुवै जनाले रकम अपचलन गरेको स्वीकार गरेका छन् ।
सशस्त्र प्रहरी स्रोत भन्छ, ‘त्यहि दर्जाका अरुले बर्दी लगाएर चौबिसै घण्टा फिल्डमा खटिनुपर्छ । त्यसैले कहिल्यै पनि लेखाका सइहरूले सेकेण्डम्यानलाई समेत नटेरेका उदाहरण छन् । किनभने उनीहरूले कहिल्यै छिर्केबिर्के पोशाक चुस्ता लगाउनु पर्दैन, कवाज तालिम केही लिनै पर्दैन ।’ सरुवा पनि बिचित्र खालको हुने गरेको उनीहरूको दाबी छ । ‘आफ्नै क्षेत्र (लेखा) मा खटिन्छन्, सरुवा हुँदा गण मात्र परिवर्तन हुन्छ । एकाउण्टेण्टबाट एकाउण्टेण्टमा सरुवा हुने हो, ’स्रोतले बताएको छ । हरेक वर्ष एउटा गणबाट अर्को गणमा सरुवा हुने भएपछि उनीहरू हिसाब किताब मिलाउन सजिलो हुने गरी गणका हाकिम नै फेरबदल गर्न समेत पछि पर्दैनन् । लेखाको हिसाब सजिलैसँग मिलाउन सहज हुनेगरी आईजीपीलाई भनाएर एसपीको सरुवा गराइदिन्छन् ।
बिज्ञापन
क्षेत्रगत रुपमा हेर्दा सशस्त्रमा पूर्वतिरका एकाउण्टेण्टहरू सबैभन्दा उत्पातका देखिएका छन् । उनीहरूले ठूला हाउजिङमा लगानी गरेका छन् । सेयरलगायतका क्षेत्रमा इन्भेष्टमेण्ट गरेका छन् भने जग्गा प्लटिङ्ग गरेर समेत बसेको देखिए पनि उनीहरुको हकमा अनुसन्धान हुन नसकेको प्रहरी उच्च अधिकारीहरु बताउँछन् ।
