राष्ट्रिय प्रकृति संरक्षण कोषले अवैधानिक रुपमा करारका कर्मचारीहरुको तह वृद्धि (बढुवा) गरेको छ । स्थायी पदपूर्ति हुनुपर्ने पद खाली रहेका पदमा काम गर्न पठाउन सकिने गरी करारका कर्मचारीलाई एक तह बढाएर नियुक्ति दिइएको हो । यस्का लागि कोषको सञ्चालक समितिको बैठकले आफूखुसी मापदण्ड बनाइर कर्मचारीको करार नवीकरण गर्दा एक तह बढुवा गरिदिएको हो ।
बिज्ञापन
सरकारले भर्ना गर्ने करारका कर्मचारीहरु बढुवा हुने प्रावधान नै नभए पनि कोषले करारका कर्मचारीलाई एक तह बढुवा गर्ने निर्णय गरेको हो ।
बिज्ञापन
कोषले संविधान र कानूनको धज्जी उडाउँदै कोषले गत साउन १ देखि लागू हुने गरी करारका ३१ कर्मचारीलाई नवीकरण सहित एक तह बढुवा गरेको पाइएको छ । कोष सञ्चालक समितिले प्रतिस्पर्धालाई निषेध गर्दै एकसाथ ३१ कर्मचारीलाई घुमाउरो बाटोबाट उपल्लो पदमा उकालेको हो।
कोषका अनुसार कम्तीमा ८ वर्ष वा सोभन्दा बढी अवधि एउटै पदमा काम गरेका र पछिल्लो चार वर्षको कार्यसम्पादन मूल्यांकन ६० प्रतिशतभन्दा बढी भएको र शैक्षिक योग्यता पुगेको हुनुपर्ने जस्ता मापदण्ड तय गरेको हो। शैक्षिक योग्यता पुगेको अवस्थामा एक तह वृद्धि गर्ने सञ्चालक समितिको निर्णयअनुसार ३१ कर्मचारीहरु साउन १ गतेदेखि एक तह बढुवा भएका हुन । कोषमा अहिले १५० भन्दा बढी करारका कर्मचारी रहेकामा प्राप्त विवरण अनुसार,नौ जना अधिकृतबाट वरिष्ठ अधिकृत बनेका छन् । तीन जना सहायक तृतीयबाट बढुवा भएर अधिकृत बनेका छन् । तीन जना सहायक द्वितीयबाट सहायक तृतीयमा बढुवा भएका छन् । दुई जना सहायक प्रथमबाट सहायक द्वितीयमा बढुवा भएका छन् । चार जना सहयोगी तृतीयबाट सहायक प्रथममा बढुवा भएका छन् । तीन जना सहयोगी द्वितीयबाट सहयोगी तृतीयमा र सात जना सहयोगी प्रथमबाट सहयोगी द्वितीयमा बढुवा भएका छन् ।
बिज्ञापन
जबकी कोषको आर्थिक प्रशासन र कर्मचारी विनियम, २०५३ ले करारका कर्मचारी बढुवा गर्ने व्यवस्था नै गरेको छैन । विनियमावलीमा स्थायी कर्मचारीको मात्रै बढुवा प्रक्रियाबाट पदपूर्ति हुने व्यवस्था छ ।
अझैं रोचक त,कोषकै विनियममा पनि सबैखाले कर्मचारी भर्ना, बढुवा गर्दा पदपूर्ति समितिले सिफारिश गर्नुपर्ने व्यवस्था गरेको छ । अधिकृत स्तरका कर्मचारीको नयाँ भर्ना वा बढुवाद्वारा पदपूर्ति गर्न सदस्यसचिव र त्यसभन्दा तलका कर्मचारीको हकमा प्रशासन शाखाका निर्देशकको अध्यक्षतामा रहने समितिले सिफारिश गर्नुपर्ने व्यवस्था भए पनि ती व्यवस्थाकै धज्जी उडाउँदै करारका कर्मचारीहरुलाई एक तह स्तरवृद्धि गरिएको हो ।
