नेपाली सेनामा कल्याणकारी कोषको रकम आउने प्रमुख स्रोत शान्तिसेनाबाट प्राप्त रकम हो । यो रकम जम्मा गर्ने क्रममा हालसम्म विदेशी भूमिमा हजारौँ जना घाइते भएका छन् । ७३ जनाले ज्यान गुमाएका छन् भने ६९ जना अशक्त छन् । कल्याणकारी कोषको रकम खर्च हुने प्रत्येक चेकमा प्रधानसेनापतिको दस्तखत हुन्छ । २०७२ साउन २३ बाट २०७५ साउन २३ गतेसम्म प्रधानसेनापति बनेका राजेन्द्र क्षत्रीको कार्यकालमा सबैभन्दा बढी कल्याणकारी कोषको रकम भ्रष्टाचार भएको छ ।

आर्मी लेखिएको ट्र्याकसुट रु. ६०० को दरले चाइनास्थित छङ्तु क्लोदिङ कम्पनीबाट आफ्नो छोरा अभिषेक खत्रीलाई व्यापारी बनाई एक लाख थान ल्याएर सबै सैनिकलाई रु. २२०० का दरले अनिवार्य किन्न लगाइयो । १६ करोडभन्दा बढी रकम चोखै फाइदा भयो । यो ट्र्याकसुट खरिद गर्न जर्नेल रोशन खड्काले राजेन्द्र क्षत्रीलाई कल्याणकारीको रकम उपलब्ध गराएबापत जनसेवाश्री दोस्रो पदक पुरस्कार दिए र महासेनानीमा पदोन्नती पनि भए । नत्र उनी कर्णेलमै घर जान्थे । यिनै रोशनले कल्याणकारीमा हुँदा २०७४ मंसिरमा सञ्जोग समशेर जवराको धोबीघाटस्थित १ रोपनी १५ आना घरजग्गा खरिद गर्दा मध्यस्थताको भूमिका खेले भने २० करोड रकम कल्याणकारीबाट नगद लिएर सञ्जोगलाई बुझाई आभूषणको नाममा पास गरेका थिए ।