अर्थ मन्त्रालय अन्तर्गतको महालेखा नियन्त्रकको कार्यालयले प्रशासन सेवा लेखा समूहको कर्मचारीको जनशक्ति व्यवस्थापन मापदण्ड जारी गरेको छ ।
जस अनुसार कर्मचारीको सेवा अवधि र हालको कार्यालयमा कार्यरत अवधि,संगठनको आवश्यक्ता र संस्थागत संस्मरण,कर्मचारीको कार्यसम्पादनस्तर,कार्यव्यवहार र पेशागत आचरण,भौगोलिक क्षेत्रका कार्यालयहरुमा कार्य अनुभव,वैदेशिक अध्ययन,तालिम,भ्रमण,विशेष परिस्थिति र कर्मचारी सरुवा निवेदनका आधारमा जनशक्ति व्यवस्थापन गरिने मापदण्डमा उल्लेख छ ।
हालै जारी भएको सरुवा मापदण्डमा प्रचलित कानुन बमोजिम न्यूनतम अवधि पूरा नगरी सरुवा नगरिने,अवधि पूरा भएका कर्मचारीहरुलाई कार्यालयको आवश्यक्ता,रिक्त दरबन्दी,सेवा,अनुभवका आधारमा व्यवस्थापन गरिने मापदण्डमा उल्लेख छ ।
यस्तै,एउटै कार्यालयमा न्यूनतम अवधिभन्दा बढी काम गरेका कर्मचारीहरुलाई सरुवा गरिँदा सबैभन्दा बढी सेवा गरेका आधारमा सरुवा गरिने,महालेखा र कोलनिकाका कार्यालय बाहेकका कार्यालयमा पाँच बर्ष वा सो भन्दा बढी अवधि कार्यरत कर्मचारीलाई प्रथामिकताका आधारमा सरुवा गरिने,एउटै कर्मचारीलाई पटक पटक एउटै प्रकृति,भूगोल र उस्तै कार्यबोझ भएको कार्यालयमा नखटाई फरक फरक भौगोलिक क्षेत्रका कार्यालय,हिमाली तथा पहाडी जिल्लाका कार्यालय र तराईका सुगम तथा सुविधाजनक कार्यालय,केन्द्रीयस्तर र जिल्लास्तरका कार्यालय र मलेनिका,कोलनिका कार्यालयमा सरुवा गरिने उल्लेख छ ।
यस्तै मलेनिका र कार्यालयमा कर्मचारी खटाउँदा सम्भव भएसम्म नयाँ र अनुभवि दुबै प्रकारको कर्मचारी खटाइने,जिल्लास्थित कार्यालयमा खटाइँदा सम्बन्धित जिल्लाको कोलनिका कार्यालयसँग परामर्श गरिने उल्लेख छ ।
यस्तै,कार्यालय प्रमुखको खटन पटन गरिँदा कार्यालयको कार्य प्रकृति,कार्यबोझ,वित्तिय अनुशासन,नेतृत्व क्षमता,कार्यसम्पादन,आचरणलाई आधार मानिने उल्लेख छ ।
बिज्ञापन
