बिज्ञापन

बिज्ञापन

अनलाइन निवेदन भरेर जैविक विवरण बुझाउन प्रतीक्षा सूचीमा रहेका सेवाग्राहीलाई प्राथमिकतामा राखी अभियान सञ्चालन गरिनेछ। यसका लागि खटिने कर्मचारीलाई अतिरिक्त प्रोत्साहनको समेत व्यवस्था गरिएको जिल्ला प्रशासन कार्यालयले जनाएको छ।
जिल्ला प्रशासन कार्यालयको पछिल्लो तथ्याङ्कअनुसार राहदानी सेवाका लागि ९९६ जना र राष्ट्रिय परिचयपत्रका लागि ४ हजार २९१ जना सेवाग्राही पालो कुरिरहेका छन्। जैविक विवरण अर्थात् औँठाछाप, आँखाको भित्री भागको पहिचान र डिजिटल तस्बिर बुझाउन अनलाइन निवेदन दिएको मितिदेखि नै सेवाग्राहीले ३५ दिनसम्म प्रतीक्षा गर्नुपर्ने अवस्था रहेको प्रशासनले जनाएको छ।
सेवा लिनका लागि अनलाइन निवेदन भर्ने र जैविक विवरण बुझाउने काम एउटै दिनमा सम्पन्न हुने वातावरण निर्माण गर्ने उद्देश्यले अभियान सञ्चालन गरिएको हो। सेवाग्राहीले अनावश्यक रूपमा लामो समय प्रतीक्षा गर्नुपर्ने अवस्था अन्त्य नभएसम्म अभियानलाई निरन्तरता दिइने प्रमुख जिल्ला अधिकारी श्रवणकुमार पोखरेलले बताएका छन्।

प्रमुख जिल्ला अधिकारी पोखरेलका अनुसार अभियान प्रभावकारी रूपमा सञ्चालन गर्न आवश्यक थप साधनस्रोत उपलब्ध गराउन स्थानीय तहहरूले समेत सहयोग गर्ने आश्वासन दिएका छन्। प्रशासनले उपलब्ध जनशक्ति र स्रोतसाधनलाई अधिकतम परिचालन गर्दै लामो समयदेखि थुप्रिएका निवेदनलाई क्रमशः शून्यमा झार्ने रणनीति अघि बढाएको छ।