बैंकसँग सेटिङ्गको काँग्रेसका नेताहरुले अदालतको आदेशलाई समेत कुल्चँदै काठमाडौं तारकेश्वरस्थित करोडौैंको घरजग्गामा कब्जा जमाएसँगै एक पूर्व प्रहरी हवल्दार सडकमा पुगेकी छन्, हप्ता दिनदेखि माइतीघर मण्डलामा धर्नामा छिन् । भन्छिन्– ज्योति विकास बैंकका सिइओ, ऋण शाखाका कर्मचारी र उनै पूर्वमुख्यमन्त्री बहादुर सिंहले मलाई डुबाए । अदालतले मालपोतलाई जग्गा बेचबिखन नगर्नु/नगराउनु भनेर अन्तरिम आदेश दिएको छ, अर्कातिर त्यही जग्गा लिलामीको प्रक्रिया अगाडि बढाएर बहादुरसिंहका नाममा पास भएकोले सत्यतथ्य छानबिन गरी दोषीमाथि कडा कानुनी कारवाहीको माग राख्ने उदयपुरको चौदण्डीगढी नगरपालिका निवासी सरिता कार्कीको बेदना हो यो ।
प्रहरीमा झण्डै १७ वर्ष सेवा गरिन्, हवल्दारबाट रिटायर्ड भएकै १४ वर्ष बित्यो । अवकाशको वर्ष दिनपछि रोजगारीका लागि दुबई पुगी त्यहाँको प्रहरीमा ६ वर्ष बिताएर स्वदेश फर्किइन् । प्रहरी सेवामा काम गरे पनि लोकदोहोरीको क्षेत्रमा पनि उत्तिकै सक्रिय छिन् । गायक खेम सेञ्चुरीसँग गाएको रुमाल बैनामा चर्चित गीतमध्ये एक हो । झिल्के ड्राइभर, मुख छोप्यौ लाजैले लगायतका दर्जनौं गीत छन् । श्री सम्पत्ति कांग्रेस नेता बहादुरसिंह लामाको कब्जामा पुगेसँगै आँशु बगाएर हिँड्नुपर्ने अवस्थामा पुगेकी छन् । काठमाडौं जिल्ला अदालतका न्यायाधीश दीपक ढकालको इजलाशबाट भएको आदेशलाई समेत कुल्चँदै मालपोतले रोक्का राखेको जग्गा लिलामी गरेर बहादुरसिंह लामाले आफ्नो बनाइदिए– जेठ २८ गते ।

बिज्ञापन

पाँच वर्षअघि काठमाडौँको तारकेश्वर नगरपालिकास्थित काभ्रेस्थली, जितपुर फेदीमा रहेको ४ आना जग्गा खरिदका लागि भन्दै उमामाया तामाङले ५७ लाख ३० हजार रकम लिएकी थिइन् । भैरवी रियल स्टेट, काठमाडौँ जितपुर गा.वि.स. वडा नं. ६ बस्ने उमामाया तामाङ र गजेन्द्र छन्त्यालको संयुक्त नाममा दर्ता रहेको कित्ता नम्बर १ सयको जग्गा कित्ताकाट गरी आनाको एघार लाख रूपैयाँको दरले ६ आना जग्गा खरिद गर्ने सहमति थियो । पटक–पटक सहमतिअनुसार जग्गा पास गरिदिन आग्रह भयो । केही सुनुवाई भएन । सोही जग्गा देखाई अरुसँग पनि यसैगरी रकम लिएको थाहा पाइन् । पटक पटकको अनुरोधपछि उमामाया प्रोप्राइटर र सञ्चालक रहेको भैरवी रियल स्टेटको नाममा ज्योति विकास बैंक नेपालटारस्थित खाता नं. ०४०००१००३१०९७०००००१ बाट भुक्तानी हुने गरी मिति २०७८ फागुन २६ को मितिमा २७ लाखको चेक ०००६९३४५७३/६००१ र ०७८ चैत १२ मा थप २७ लाख गरी चौवन्न लाख रूपैयाँको चेक दिने काम भयो । सो चेकमा उल्लेख भएअनुसारको रकम भुक्तानीको लागि पटक–पटक जाँदा पर्याप्त निक्षेप नभएको कारण चेक सटही हुन सकेन । चेक अनादर भएकोले ५४ लाख रकम र बिगो भरिभराउ मितिसम्म कानुनबमोजिम हुने ब्याजसमेत प्रतिवादीबाट दिलाई सजायको माग राखेर अदालत पुगेँ । अदालतले १० प्रतिशत क्षतिपूर्तिसमेत थपेर भुक्तानी गर्न आदेश दियो । अदालतले ज्योति विकास बैंक केन्द्रीय कार्यालयलाई पत्र लेखेर कित्ता नम्बर ४७२ र ४९१ को जग्गा कर्जा असुली प्रयोजनका लागि लिलाम हुने प्रक्रियामा रहेकाले सोबाट असुली गरी बढी हुन आउने रकम कुन खातामा जम्मा हुने हो, सोमध्ये ७४ हजार ७ सय रकम र जग्गा रोक्का राखी अविलम्ब जानकारी गराउन भनेको छ ।