बिज्ञापन

बिज्ञापन

यही क्रममा भूमिगत जलश्रोत तथा सिँचाइ विकास डिभिजन कार्यालय, सर्लाहीकी डिभिजन प्रमुख अनुपमा ढकाल अख्तियार दुरुपयोग अनुसन्धान आयोगको टोलीबाट साढे ७ लाख रुपैयाँ घुससहित रंगेहात पक्राउ परेकी छन्। अख्तियार दुरुपयोग अनुसन्धान आयोगका अनुसार साउन ८ गते बर्दिबासस्थित आयोगको कार्यालयबाट खटिएको टोलीले डिभिजन प्रमुख ढकालसँगै सोही कार्यालयका मेकानिकल अधिकृत तुलाकान्त चौधरीलाई सेवाग्राहीबाट घुस लिइरहेको अवस्थामा नियन्त्रणमा लिएको हो।

अनुसन्धानबाट बोरिङ तथा मोटर जडानको काम सम्पन्न भइसकेपछि त्यसको भुक्तानी निकासा गरिदिने क्रममा सेवाग्राहीसँग रकम माग गरिएको खुलेको छ। भुक्तानी प्रक्रिया अनावश्यक रूपमा रोक्दै दुःख–हैरानी दिएर घुस मागिएको भन्ने सूचना तथा उजुरीका आधारमा अख्तियारले निगरानी बढाएको थियो। त्यसक्रममा बागमती नगरपालिका–१२ स्थित डिभिजन प्रमुख ढकालको सरकारी क्वार्टरबाट सेवाग्राहीसँग लिइएको ७ लाख ५० हजार रुपैयाँसहित दुवै जनालाई रंगेहात पक्राउ गरिएको आयोगले जनाएको छ। खानतलासीका क्रममा घुसबापतको रकमबाहेक स्रोत खुल्न नसकेको थप ७१ हजार ११५ रुपैयाँ नगद र तीन थान मोबाइल फोनसमेत बरामद भएको अख्तियारका प्रवक्ता सुरेश न्यौपानेले जानकारी दिएका छन्। बरामद गरिएका नगद तथा मोबाइल फोनलाई अनुसन्धानका लागि नियन्त्रणमा लिइएको छ।

प्रारम्भिक अनुसन्धानले सरकारी भुक्तानी प्रक्रियालाई प्रभावमा पारेर सेवाग्राहीसँग आर्थिक लाभ लिन खोजिएको देखिएको अख्तियारको भनाइ छ। पक्राउ परेका डिभिजन प्रमुख ढकाल र अधिकृत चौधरीमाथि भ्रष्टाचार निवारण ऐनअन्तर्गत थप अनुसन्धान भइरहेको आयोगले जनाएको छ।

यता अघिल्लो बर्ष अख्तियारले भ्रष्टाचारजन्य कसुरमा १३५ वटा र सम्पत्ति शुद्धीकरण कसुरमा २ वटा गरी जम्मा १३७ वटा मुद्दा विशेष अदालतमा पुर्‍याएको जनाएको छ । जसमध्ये भ्रष्टाचारजन्य कसुरमा दायर भएका मुद्दामध्ये सबैभन्दा बढी अर्थात् ३७ वटा मुद्दा घुस रिसवतसम्बन्धी रहेका छन् । त्यसपछि क्रमशः गैरकानुनी लाभ हानिसम्बन्धी ३५ वटा, झुटा नक्कली शैक्षिक प्रमाणपत्रसम्बन्धी २७ वटा, सार्वजनिक सम्पत्तिको हानि नोक्सानीसम्बन्धी २४ वटा, गैरकानुनी सम्पत्ति आर्जनसम्बन्धी ८ वटा, र विविध विषयका ४ वटा मुद्दा रहेका छन् । उल्लिखित मुद्दाहरूमा ९४ जना महिला, ६१९ जना पुरुष र ४० संस्था गरी कुल ७५३ प्रतिवादीविरुद्ध कैद सजाय र जरिवानाका अतिरिक्त जम्मा ६ अर्ब १ करोड ८४ लाख ७२ हजार ६ सय ९२ रुपियाँ ९३ पैसा बिगो मागदाबी लिइएको छ । अर्थात ९४ जना महिला र ६१९ पुरुषसँग राज्यको झण्डै ६ अर्ब अकुत सम्पत्ति कुम्लाएका छन् । ६१९ जना पुरुषहरुले घुस खाँदा ९४ जना महिलाहरु फन्दामा परेका छन् । घुस खानेमा ६ महिला र ७१ पुरुष राष्ट्रसेवक छन् । उनीहरुविरुद्ध ४ करोड ९२ लाख ७६ हजार ८ सय बराबरको मुद्धा चलेको छ भने गैरकानुनी लाभ हानीका २८८ मुद्धामा २७ महिला प्रतिवादी बनाइएको छ उनीहरु उपर ८२ करोड ५५ लाख ५७ हजार ४४ मागदावी लिइएको छ । यस्तै गैरकानुनी सम्पत्ति आर्जनमा २० प्रतिवादीमध्ये ९ जना महिला प्रतिवादी छन् ।