बिज्ञापन

बिज्ञापन

२०८२ साल वैशाख १४ गते राष्ट्रिय सभामा दर्ता भएको यो विधेयकमाथि २०८२ साल जेठ ६ गते सभामा प्रस्तुत भएको थियो । २०८२ साल असार ९ गते सभामा सामान्य छलफल भयो । त्यसपछि दफावार छलफलका लागि २०८२ साल साउन १४ गते विधायन व्यवस्थापन समितिमा पठाइएको थियो । विधायन समितिले पारित गरेर सभामा पेस गरेसँगै विधेयक सभाबाट पारित भएको हो ।

विधेयक पारित हुँदै गर्दा भने सभामा रोचक दृश्य देखिएको छ । बैठकमा प्रधानमन्त्री समेत रहेकी सञ्चार तथा सूचना प्रविधिमन्त्री सुशीला कार्कीको तर्फबाट महिला, बालबालिका तथा ज्येष्ठ नागरिकमन्त्री श्रद्धा श्रेष्ठले ‘चलचित्र विधेयक पारित गरियोस्’ भन्ने प्रस्ताव पेश गरेकी थिइन् ।

त्यसपछि केही समय छलफलको सत्र चलेकोमा सभाका सदस्यहरुले प्रश्न सोधेका थिए । सो क्रममा सांसद तारामान स्वारले एउटा प्रश्न टिपाएका थिए । यद्यपि, उनको प्रश्न मन्त्री श्रेष्ठले पुरा सुनाइनन्, अन्कनाउँदै भनिन्, ‘नियमितभन्दा नियन्त्रणमा चलचित्र बनाइएको ’

त्यसपछि उनले सो प्रश्नको जवाफ आफूलाई थाहा नभएको भन्दै सहसचिवसँग सोध्ने अनुमति मागिन् । ‘के भन्न चाहन्छु भने म सम्बन्धित मन्त्रालयको नभएकोले हाम्रो सहसचिवज्यूले यो टिप्पणीमा जति प्रश्न लेखिदिनुभएको थियो, त्यति मात्र थाहा छ’, सभाध्यक्ष नारायणप्रसाद दाहालतिर हेर्दै उनले भनिन्, ‘एक चोटी सोधेर आउँ ? मलाई पाँच मिनेट दिनुस् न है !’

मन्त्री श्रेष्ठले कतिपय शब्द उच्चारण गर्न नसक्दा समेत सभाको माहोल रमाइलो बनेको थियो । उनलाई ‘यर्थाथपरक’ भन्न हम्मेहम्मे भयो । त्यस्तै उनले ‘आदरणीय सभा’ भनेपछि बैठक हलमा हाँसो गुञ्जिएको थियो ।