कलाकार भिसामा विदेश पठाइदिने भन्दै ठगी गरेको आरोपमा कलाकार सुलेमान शंकर (इकु) प्रक्राउ परेका छन् । प्रहरीको केन्द्रीय अनुसन्धान ब्यूरो (सीआईबी)ले काठमाडौंको धुम्बाराही बस्ने ४० वर्षीय सुलेमान शंकरलाई पक्राउ गरेको हो ।
बिज्ञापन
कलाकार भिसामा विदेश पठाइदिन्छु भन्दै ठगेपछि केन्द्रीय अनुसन्धान ब्यूरोले उनलाई बूढानीलकण्ठ क्षेत्रबाट पक्राउ गरिएको प्रहरीले जनाएको छ ।
बिज्ञापन
इकुले क्यानडा, अमेरिका र युरोपका विभिन्न देशमा कलाकार भिसामा लगिदिने र त्यहाँ गएपछि आकर्षक कमाइ हुने भन्दै प्रतिव्यक्ति १५ देखि २० लाख रुपैयाँसम्म ठगी गरेको प्रहरीको आरोप छ ।उनको एसएमएस फिल्म प्रालिको नाममा रहेको बैंक खातामा पैसा जम्मा गर्न लगाइ विदेशी मुलुकमा भीसाका लागि आवश्यक पर्ने बैंक स्टेटमेन्ट लगायतका कागजातहरू समेत नक्कली बनाउने, रकम जम्मा गर्ने पीडितहरूले भीसा तथा जाने मितिको बारेमा सोधपुछ गर्दा विदेशमा कार्यक्रमको लागि तयारी भइरहेको बताउने र लामो समयसम्म झुलाउने गरेको उजुरी परेको थियो । सोही उजुरीका आधारमा प्रहरीले सुलेमानलाई पक्राउ गरेको हो ।
इकुलाई यस अघि गत कात्तिकमा उनीसहितको टोली जुवातास खेलेको आरोपमा पक्राउ परेका थियो । जिल्ला प्रशासन कार्यालय, काठमाडौंको आदेशपछि १५–१५ हजार रुपैयाँ धरौटीमा उनीहरुलाई छोडिएको हो ।
काठमाडौं जिल्ला अदालतबाट सात दिनको म्याद थपेर शंकरमाथि अनुसन्धान थालिएको प्रहरीले जनाएको छ ।
