ठेक्का तोड्न नमानेको कारण पक्राउ परेका दुई कर्मचारीलाई अहिले प्रहरी परिसर काठमाडौं लगेको छ । सिँचाइ विभागका महानिर्देशक दिनेश रजौरिया र सुनकोसी–मरिन डाइभर्सन आयोजनाका प्रमुख कृष्णप्रसाद रिजाललाई प्रहरीले पक्राउ गरि प्रहरी परिसर काठमाडौं लगिएको हो ।
करिब महिना दिनअघि महानिर्देशक बनेका रजौरियालाई प्रधानमन्त्री सचिवालयको निर्देशनमा हिजो नियन्त्रणमा लिइएको हो। सुनकोशी मरिण डाइभर्सनको ठेक्का प्रक्रिया रद्द गर्न दिएको दबाब नमान्दा उनलाई प्रहरी लगाएर उठाएर काठमाडौं ल्याइएको हो ।

बिज्ञापन

अनुगमनका लागि मधेश प्रदेश पुगेका महानिर्देशक रजौरियालाई प्रहरीले हिजो दिउँसो सिरहाबाट पक्राउ गरेको थियो । यसैगरी, सुनकोसी–मरिन डाइभर्सन आयोजनाका प्रमुख रिजाललाई सिन्धुलीस्थित कार्यालयबाटै प्रहरीले नियन्त्रणमा लिएको थियो । काठमाडौं उपत्यका अपराध अनुसन्धान कार्यालय र जिल्ला प्रहरी परिसर काठमाडौंको निर्देशनमा जिल्ला प्रहरी कार्यालय सिन्धुली र सिरहाले महानिर्देशक र आयोजना प्रमुखलाई काठमाडौं ल्याएको हो । उनलाई सिरहा र आयोजना प्रमुखलाई सिन्धुलीबाट पक्राउ गरिएको थियो । अहिले उनीहरुमाथि थप अनुसन्धानका लागि काठमाडौं ल्याइएको भए पनि प्रहरीले उनीहरूमाथिको अनुसन्धानको विषय र पक्राउको आधिकारिक कारण सार्वजनिक गरेको छैन । यद्यपि पक्राउको कारण सुनकोशी मरिण डाइभर्सन बहुउद्देश्यीय आयोजनाको बाँध, विद्युत् गृह तथा हाइड्रोमेकानिकल संरचना निर्माणसम्बन्धी नयाँ ठेक्काको कारण पक्राउ गरेको बताइएको छ ।