सरकारले सहसचिवबाट सचिवमा बढुवा भएका रुद्रसिंह तामाङलाई उद्योग, वाणिज्य तथा आपूर्ति मन्त्रालयको सचिवमा पदस्थापन गर्ने निर्णय गर्यो गत असोज ५ मा । यसरी उद्योगमा पुगेको तीन साता नबित्दै सचिव रुद्रमान तामाङ विवादमा तानिएका छन् । दुई महिना अगाडिमात्र उद्योगमा पुगेका सचिव नारायणप्रसाद शर्मालाई प्रधानमन्त्री तथा मन्त्रिपरिषद्को कार्यालयमा सरुवा गर्दै लाई उद्योग मन्त्रालयको सचिवमा पदस्थापन गरेको थियो ।
उनी सरुवा भएर गएको तीन साता पछि मन्त्रालयले गरेको १७ उपसचिवको सरुवा विवाद प्रधानमन्त्री कार्यालयसम्म पुगेको छ ।  गत असोज १६ गते सचिवस्तरबाट १३ जना उपसचिवको सरुवा गर्ने निर्णय भएको मन्त्रालयले जनाएको छ । मन्त्रालयको प्रशासन शाखाका उपसचिव रामहरि पौडेललाई टिप्पणी उठाउन लगाएर सचिवसमक्ष पुर्‍याइएको र सचिवले सरुवा सदर गरेको सो सरुवा प्रक्रिया विवादित बन्न पुगेसँगै असोज २२ को मितिमा मात्र सरुवा सूची सार्वजनिक गरिएको थियो ।

बिज्ञापन

एक साता पछि २२ असोजको मिति राखेर मन्त्रालयले १७ उपसचिवस्तरका कर्मचारीहरुको सरुवा गरेको थियो । सरुवा सूची अनुसार, ध्रुवबहादुर कुँवर, रामप्रसाद ज्ञवाली, तारानाथ लुईंटेल, माधवप्रसाद अधिकारी, रामकृष्ण श्रेष्ठ, अनिल किराती, लक्ष्मीकुमारी शाही, अन्जु पोखरेल, अमन कुमार कर्ण, कविता निरौला ढुंगेल, सन्ध्या सिग्देल, जेमा सुब्बा, विनोद प्रसाद उपाध्याय, जोरा सिंह माझी, भोला प्रसाद चापागाईं, रामकृष्ण श्रेष्ठ, धर्मा कुमारी बेल्वासे र मनोज कुमार वि।क। गरी १७ जना उपसचिवहरूको जिम्मेवारी हेरफेर गरिएको छ।
सरुवा गरिँदा कम्पनी रजिष्ट्रार कार्यालयबाट रामप्रसाद ज्ञवाली र जेमा सुब्बालाई मन्त्रालय र अमनकुमार कर्ण र माधव अधिकारीलाई वाणिज्य आपूर्ति तथा उपभोक्ता संरक्षण विभागमा खटाइएको छ ।