भोटेकोशीमा बग्दैन पानी
बग्छ आँसु र पीडा
निहत्था मान्छेहरुको मुटु कुल्चेर
देख्दै गरेको सपना एकाएक बगी जान्छ
सम्बन्धका न्याना हातहरु टुटाएर
बिछोडको नमिठो कथा लेख्दै जान्छ ।
आँगनहरु सुनसान छन
छैन बालबालिकाको सुमधुर हाँसो
आँगन भरी उफ्रने खुसीका पाइलाहरु
अनायसै रोकिएका छन
आमाहरु छाती पिटेर रुन्छन
बाबुको मन पीडाले चर्कि रहेकै छ ।
घरका दिवालहरु मौन छन
आफ्नै भग्नावशेषले थिचिएर
हराएका सपना खोज्न नसकी
निराशाका दुःखद गीत गाउँछन
हिजो जीवन चलिरहेकै थियो
आज मृत्युको छाया कुद्छ
समय र ठाँउ उही भए पनि
त्यहीबाट हराएका छन सृष्टिका सुन्दर फूलहरु
र बदलिएको छ दैनिकी
हिजो जीवन हाँस्थ्यो, आज मृत्यु हाँस्छ
बाढीले घर खेत बगायो
आमाको काख बगायो
बाबुको साथ बगायो
मेहनतले बनाएको सुन्दर संसार बगायो ।
बाटो बगायो
पुल बगायो
बगायो जलबिद्युत संरचना
मान्छेहरु सुरुङ भित्रै फसिरहे
जीवन मरणको अभिलेख छैन
बोल्ने बोलाउने मान्छे छैन
खाने ख्वाउने मान्छे छैन
मान्छेहरु जीवनको झिनो आशा बोकेर
उद्धार र राहतको प्रतीक्षामा छन
सरकार उदासीनता प्रकट नगर
हामी साथ दिन तयार छौ भन्दा भन्दै
एकलकाँटे निर्णय गर्ने दुष्साहस नगर ।
भोटेकोशी !
मानवता किन खोस्यौ ?
तिम्रो काम जीवन दिनु थियो
तिमीले त जीवन खोसेर लग्यौ
तिमीले दिएको पीडा कदापि भुल्ने छैन मान्छे
भन भोटेकोशी !
तिम्रो रौद्रता कहिले सम्म ?
म शोकम बजाउँदिन शोकधुन
शोकधुनले नियास्रो जगाउँछ
बिरहको बजाउँदै नबजाउ बाँसुरी
बाँच्नेहरुको मनमा पीडा जाग्छ
चहर्याउँछ पोलिरहेको घाउ
सहानुभूति मलहम पट्टि हुन सक्छ
दुखेको मन बोकेर
श्रद्धाञ्जली दिउँ कसरी ?
नियतिले चुट्न सम्म चुट्यो
अपाङ्ग घाइते छटपटि रहेछन
जिजीविषा मरेको छैन
म प्रार्थना गर्छु
स्निग्ध जिन्दगीको ।
(०८३/०५/१० को भोटेकोशी बाढीले निम्त्याएको बितण्डा र बिदारक घटना प्रति )
सुन्दरहरैंचा –६, दुलारी, मोरङ
९८४२०७३५२५
बिज्ञापन
बिज्ञापन
प्रतिक्रिया दिनूहोस्
यो खबर पढेर तपाईलाई कस्तो महसुस भयो ?
0%
like
0%
love
0%
haha
0%
wow
0%
sad
0%
