बिज्ञापन

बिज्ञापन

टोलीले बिरामी राख्नका लागि २० थान बेड तथा म्याट्रेस, आकस्मिक औषधि, सुगर र रक्तचापलगायत दैनिक सेवन गर्नुपर्ने औषधि, अक्सिजन सिलिन्डर तथा अन्य आवश्यक स्वास्थ्य सामग्री लिएर गएको छ। त्यस्तै, प्रभावित नागरिकका लागि २०० थान कपडा, २० बक्स चाउचाउ, १०० प्याकेट बिस्कुट, पानीलगायतका राहत सामग्रीसमेत टोलीसँग पठाइएको छ।

यसैगरी, भक्तपुर अस्पतालबाट अर्को स्वास्थ्य टोली २० वटा बिरामी राख्ने बेड र अक्सिजन सिलिन्डरसहित नुवाकोटतर्फ प्रस्थान गरेको छ। बाढी तथा पहिरोबाट प्रभावित क्षेत्रमा तत्काल स्वास्थ्य सेवा उपलब्ध गराउने उद्देश्यले प्रदेश सरकारले स्वास्थ्यकर्मी तथा आवश्यक सामग्री परिचालन गरेको हो।

बागमती प्रदेश सरकार, स्वास्थ्य तथा सामाजिक विकास मन्त्रालयकी सचिव डा. सुमित्रा गौतमका अनुसार प्रभावित क्षेत्रमा स्वास्थ्य सेवा पुर्‍याउन थप टोली तथा आवश्यक सामग्री परिचालन भइरहेको छ। उनका अनुसार उत्तरगया क्षेत्रमा पनि हेलिकोप्टरमार्फत स्वास्थ्य टोली तथा आवश्यक सामग्री पठाउने तयारी भइरहेको छ।

रसुवाको भोटेकोशी क्षेत्रमा आएको बाढीका कारण सडक तथा अन्य पूर्वाधारमा ठूलो क्षति पुगेपछि प्रभावित क्षेत्रमा उद्धार तथा राहतसँगै स्वास्थ्य सेवा पुर्‍याउन चुनौती देखिएको छ। सडकमार्गबाट तत्काल पुग्न कठिन भएका क्षेत्रमा हेलिकोप्टरमार्फत स्वास्थ्यकर्मी र अत्यावश्यक सामग्री पठाउने तयारी गरिएको मन्त्रालयले जनाएको छ।