भक्तपुरको सल्लाघारीस्थित यातायात व्यवस्था सेवा कार्यालय स्थानान्तरण गर्ने विषय अड्किएको छ । सर्वोच्च अदालतमा मुद्दा परेपछि स्थानान्तरण तत्कालका लागि रोकिएको हो । बागमती प्रदेशको क्याबिनेट बैठकले २०८१ वैशाख २७ गते कार्यालय स्थानान्तरणको निर्णय गरेको थियो । श्रम, रोजगार तथा यातायात मन्त्रालयले कार्यालय स्थानान्तरणका लागि पत्र पठायो । कार्यालयले स्थानान्तरणका लागि असोजमा सूचना निकाल्यो । घरभाडामा लगाउन चाहनेसँग आवेदन आह्वान गरियो । कार्यालयले घरभाडा प्रस्तावका लागि जिल्ला प्रशासन कार्यालय, काठमाडौंमा निवेदन पेश गर्‍यो । भक्तपुरमा दुइटा यातायात कार्यालय छ, त्यो पनि केही मीनेटको दूरीमा । दुवै यातायात कार्यालय भाडाको घरमा सञ्चालित छ । राधेराधेको यातायात कार्यालय जगातीबाट सारिएको हो । त्यहाँबाट लाइसेन्स सेवा प्रदान गरिँदै आइएको छ । सेवाग्राहीले सो यातायात कार्यालयमा पनि उस्तै समस्या भोगिरहेका छन् ।

बिज्ञापन

भाटभटेनी सुपरमार्केटको पछाडि रहेको उक्त कार्यालयमा पनि पार्किङ्ग सुविधा छैन । सवारी पार्किङ्गका लागि ठाउँ खोज्दै हिँड्नुपर्छ । अझ गम्भीर कुरा त के भने, कतै दुई ठाउँमा एउटै प्रकृतिको कार्यालय हुँदा कतै यातायात कार्यालय शून्य छ । बागमती प्रदेशमा १३ जिल्ला रहेकोमा रामेछाप, दोलखा, धादिङ, सिन्धुपाल्चोक, नुवाकोट र रसुवामा यातायात कार्यालय छैन । त्यहाँका नागरिक यातायातसम्बन्धी सेवा लिन टाढाटाढा जान बाध्य छन् । एउटै प्रकृतिका कार्यालयलाई गाभेर त्यो खर्चबाट सरकारले अन्य जिल्लामा कार्यालय खोलिदिएमा नागरिकले सहज सेवा सहज हुन्थ्यो तर लामो समयदेखि स्थानान्तरणको विषय अलपत्र पर्दै आएको छ । झण्डै दुई दशकदेखि सरकारी कार्यालय एउटै भाडाको घरबाट सञ्चालन हुनु आश्चर्यजनक विषय रहेको जानकारहरु टिप्पणी गर्दछन् । मेन रोडबाट निकै भित्र रहेको सो कार्यालय खोज्नै सेवाग्राहीलाई हम्मेहम्मे पर्ने गरेको छ । कार्यालयले घरभाडाबापत मासिक एक लाख २६ हजार रूपैयाँ घरधनीलाई बुझाउँछ । जुन ठाउँ हेरेर एकदमै चर्को हो । सो घरमा न पार्किङ्गको सुविधा छ न अन्य । सेवाग्राहीलाई सल्लाघारी चौरमा पैसा तिरेर पार्किङ्ग गर्नुपर्ने बाध्यता छ ।