ललितपुर । मालपोत कार्यालय (भूमि प्रशासन कार्यालय) लगनखेलका तीन जना नायब सुब्बा (नासु) सहित पाँच जनालाई तीन लाख रुपैयाँ घुस लिइरहेको अवस्थामा अख्तियार दुरुपयोग अनुसन्धान आयोगको टोलीले पक्राउ गरेको छ।
बिज्ञापन
जग्गाको बकसपत्र गराइदिने काममा अनावश्यक दुःख–हैरानी दिई सेवाग्राहीसँग घुस मागिएको भन्ने उजुरीका आधारमा आयोगको टंगालस्थित कार्यालयबाट खटिएको टोलीले विशेष निगरानी गरेको थियो। सोही क्रममा ललितपुर महानगरपालिका–४ स्थित एक होटलबाट सेवाग्राहीसँग तीन लाख रुपैयाँ घुस लिइसकेको अवस्थामा उनीहरूलाई रंगेहात पक्राउ गरिएको हो।
बिज्ञापन
पक्राउ पर्नेमा मालपोत कार्यालय लगनखेलका नायब सुब्बा उत्तम कुँवर, विशाल सुन्दास र राजकुमार मगर रहेका छन्। उनीहरूसँगै लेखापढी व्यवसायी शैलेन्द्र रानामगर र समिर कटवाललाई पनि नियन्त्रणमा लिइएको छ। प्रारम्भिक अनुसन्धानबाट कर्मचारी र लेखापढी व्यवसायीबीच मिलेमतो गरी सेवाग्राहीबाट रकम असुल्ने गरिएको आशंकामा अनुसन्धान अघि बढाइएको अख्तियारले जनाएको छ।
अख्तियारको टोलीले उनीहरूको साथबाट घुसबापत लिइएको तीन लाख रुपैयाँका साथै स्रोत खुल्न नसकेको २४ हजार ८९० रुपैयाँसमेत बरामद गरेको छ।
बिज्ञापन
अख्तियार दुरुपयोग अनुसन्धान आयोगका प्रवक्ता सुरेश न्यौपानेका अनुसार पक्राउ परेका पाँचै जनामाथि भ्रष्टाचारसम्बन्धी कसुरमा थप अनुसन्धान भइरहेको छ। अनुसन्धानपछि प्राप्त प्रमाणका आधारमा भ्रष्टाचार निवारण ऐनअनुसार मुद्दा दायर गर्ने प्रक्रिया अघि बढाइने आयोगले जनाएको छ।
भूमि प्रशासन तथा मालपोत कार्यालयहरूमा सेवाग्राहीलाई अनावश्यक झन्झटमा पारेर घुस असुल्ने गतिविधिविरुद्ध अख्तियारले पछिल्लो समय निगरानी र कारबाहीलाई तीव्र बनाउँदै आएको छ।
