सरकारले चालू आर्थिक बर्षको पछिल्लो सात महिनामा ६ खर्ब ६५ अर्ब २ करोड ४९ लाख रूपैयाँ राजस्व संकलन गरेको छ। यो रकम वार्षिक लक्ष्यको करिब ४५ दशमलव २२ प्रतिशत हो । अर्थ मन्त्रालय, राजस्व व्यवस्थापन सूचना प्रणालीको तथ्यांकअनुसार यो संकलन गत वर्षको सोही अवधिको तुलनामा ३ दशमलव ४५ प्रतिशतले बढी हो।। गत आर्थिक वर्षको माघ मसान्तसम्म ६ खर्ब ४२ अर्ब ४५ लाख ३९ हजार रुपैयाँ राजस्व सङ्कलन भएको थियो ।

बिज्ञापन

विभागगत रूपमा हेर्दा भन्सार विभागले गत वर्षको तुलनामा ८ दशमलव ०४ प्रतिशत बढी राजस्व संकलन गरेको छ। भन्सार विभागमार्फत २ खर्ब ७८ अर्ब ४२ करोड ८१ लाख रूपैयाँ संकलन भएको छ। यस्तै, आन्तरिक राजस्व विभागले ३ खर्ब २० अर्ब ८८ करोड ६५ लाख रूपैयाँ संकलन गरेको छ, जुन गत वर्षको तुलनामा ४ दशमलव २१ प्रतिशतको वृद्धि हो। यस्तै,माघ २९ सम्म १ खर्ब ५ अर्ब ४३ करोड ६० लाख रूपैयाँ अन्तःशुल्क संकलन भएको छ। मूल्य अभिवृद्धि कर (भ्याट) ७ दशमलव ५८ प्रतिशतले बढेर १ खर्ब ९६ अर्ब ४४ करोड १७ लाख रूपैयाँ पुगेको छ। शिक्षा सेवा शुल्क र अन्य साना शीर्षकमा भने उत्साहजनक वृद्धि देखिएको छ । यस शीर्षकमा गत वर्ष २ अर्ब १४ करोड रुपैयाँ सङ्कलन भएकोमा यस वर्ष ६१ दशमलव ०७ प्रतिशतले वृद्धि भई ३ अर्ब ४४ करोड ७५ लाख रुपैयाँ पुगेको छ ।