प्रदेशका कर्मचारीहरुले अत्यावश्यकबाहेक बिदा बस्न नपाउने भएका छन् । गण्डकी प्रदेशको सचिवस्तरीय बैठकले प्रदेशका कर्मचारीहरुलाई अत्यावश्यक बाहेक बिदा बस्न नदिने निर्णय गरेको हो ।
बिज्ञापन
सचिवस्तरीय बैठकले मन्त्रालय, निकाय र मातहतका सबै कर्मचारीलाई अत्यावश्यकबाहेक काज नखटाउने र बिदा स्वीकृत नगर्ने निर्णय गरेको हो । आइतबार बसेको सचिवस्तरीय बैठकले आन्दोलनका क्रममा सरकारी कार्यालयहरूमा भएको आगजनी र तोडफोडको घटनापछि अवस्था सामान्यीकरण गर्न ७ बुँदे निर्णय गरेको हो ।
बिज्ञापन
जस अनुसार, क्षतिको विवरण सङ्कलन गरी तत्काल सेवा सुचारु गर्नेदेखि कर्मचारीहरूलाई अत्यावश्यक बाहेक बिदा नदिने,कार्यालयका महत्त्वपूर्ण सामान हुने भएकोले बाह्य व्यक्तिलाई सरसफाइमा नखटाइने सहितका निर्णयहरु भएको गण्डकी प्रदेशले जनाएको छ ।
सचिवहरूको बैठकले जेनजीको भदौ २३ र २४ को प्रदर्शनका कारण मन्त्रालय, निकाय र मातहतका कार्यालयमा भएको आगजनी र तोडफोडबाट भएको क्षतिबारेमा समेत छलफल गरेको छ । क्षतिग्रस्त मन्त्रालयसहितका कार्यालयको विवरण संकलन गर्ने र प्रहरीको उपस्थितिमा मुचुल्का बनाई सरसफाइ गर्ने निर्णय भएको छ । सबै कर्मचारीलाई सेवाप्रवाहलाई सुचारु राख्न तत्पर रहन आह्वान गर्दै प्रदेशवासीलाई आवश्यक सेवा नरोकिने आश्वासन समेत दिएको छ ।
बिज्ञापन
सो प्रदेशमा मुख्यमन्त्री कार्यालयसहित गण्डकीका ६ वटा मन्त्रालयमा तोडफोड र आगजनीका साथैं ४ वटा मन्त्री क्वार्टर सहित दर्जनौँ सवारी साधनमा आगजनी भएको छ ।
