सांसद किरणकुमार साहद्वारा मन्त्री गुप्तालाई बर्खास्त गरी निष्पक्ष छानबिनको माग
बिज्ञापन
काठमाडौं, साउन २८ —
नेकपा (एमाले) का सांसद किरणकुमार साहले संघीय मामिला तथा सामान्य प्रशासनमन्त्री राजकुमार गुप्तालाई बर्खास्त गरी निष्पक्ष छानबिन गर्न सरकारसँग माग गरेका छन्।
बिज्ञापन
सोमबार प्रतिनिधिसभाको बैठकमा विशेष समय लिएर बोल्दै सांसद साहले मन्त्री गुप्ताको संलग्नता रहेको भनिएको घुस डिलसम्बन्धी अडियो सार्वजनिक भइसकेको अवस्थामा सरकारले मौनता साँध्नु लोकतान्त्रिक मूल्य र मान्यता विपरित भएको बताए।
उनले प्रश्न गर्दै भने, “सामान्य प्रशासनमन्त्री राजकुमार गुप्ताजीले घुस डिल गरेको अडियो सार्वजनिक भइसकेको अवस्थामा सरकार किन मौन छ ? दुनियाँले सुनेको अडियो सरकारले नसुनेको झैँ गर्नु लोकतन्त्रको अपमान हो।”
बिज्ञापन
सांसद साहले गम्भीर स्वरमा संसदमार्फत माग राख्दै भने, “म यो सदनमार्फत माग गर्दछु, गुप्ताज्युलाई तत्काल बर्खास्त गरियोस् र निष्पक्ष छानबिन प्रक्रिया अघि बढाइयोस्।”
हालै सार्वजनिक एक अडियोमा मन्त्री गुप्ता मालपोत कार्यालयसम्बन्धी एउटा सरुवाबापत रकम माग गरेको आरोपमा मुछिएका छन्। उक्त प्रकरण सार्वजनिक भएसँगै उनीबारे व्यापक रूपमा छानबिनको माग भइरहेको छ।
