अख्तियारमा रहेको मुद्दा मिलाइदिने भन्दै आफ्नै कार्यालयका कर्मचारीसँग घुस माग्ने कर्मचारीविरुद्ध अख्तियारले विशेष अदालतमा मुद्धा दायर गरेको छ ।

बिज्ञापन

अख्तियारमा उजुरी परी पत्र आएको र उजुरीसँग सम्बन्धित प्रमाण मेटाइदिने भनी सेवाग्राहीसँग २५ हजार रुपैयाँ घुस लिइरहेको अवस्थामा गत ७ चैतमा रंगेहात पक्राउ परेका अधिकृत कपिल गिरी विरुद्ध अख्तियारले महिना दिन पछि विशेषमा मुद्धा लगेको हो ।
गिरी महानगरको उजुरी फर्स्यौट तथा समन्वय शाखामा कार्यरत थिए । महानगरपालिकाले उनलाई अख्तियारले सोधेको प्रष्टीकरण वा प्रश्नहरूको महानगरपालिकाका तर्फबाट जवाफ पठाउने जिम्मेवार व्यक्ति तोकेको थियो । सोही पदीय दुरुपयोग गर्दै उनले आफ्ना महानगरकै अर्का कर्मचारीसँग ‘अख्तियारमा उजुरी छ म मिलाइदिन्छु’ भनी घुस मागेका थिए । अख्तियारमा उजुरी नै नपरेका व्यक्तिलाई नक्कली उजुरी बनाएर अख्तियारमा परेको भन्दै घुस मागेका प्रकरणमा उनी २५ हजार घुस सहित रंगेहात पक्राउ परेका थिए ।