वर्षौँअघि
आमाको काजकाम गर्न भनेर
लिएर तिर्न नसकेको ऋण र
बुझाउन नसकेको साहु
दिनहुँ मेरो आधा खल्बलिएको मस्तिष्कलाई
अझै जोडजोडले हल्लाउँछन्, घुमाउँछन्
र पानीपानी बनाउँछन्
मेरो मनलाई
जो आँखाको बाटो भएर
कसैले नदेख्ने गरी
राती चुहिन्छ
सिरानीमा तप्पतप्प
र ओभानो रहँदैन त्यो सिरानी
बिज्ञापन
अनौठो शान्तिमा पनि
टिकटिक गर्दै एकनासले
त्यो भित्ताको घडीमा
समय घुमेकै घुमेको छ
एक प्रहरको अत्यासलाग्दो शान्तिपश्चात्
थकित आँखाहरू ओभाउन थाल्छन्
र चिसिएको मनले
केही राहत खोज्न थाल्छ
म छामछाम, छुमछुम गर्दै
सिरानीमुनिबाट
दिउँसोको बाँकी बिँडीको ठुटो झिक्छु
र सल्काउँछु
यो फोक्सोको बाटो भएर
चिसो तुसारोले कठ्याङ्ग्रिएको
मुटुलाई सेक्न।
बिज्ञापन
