काठमाडौं । प्रधानमन्त्री केपी शर्मा ओलीले आज साँझ ६ बजेपछि बालुवाटारमा मन्त्रिपरिषद्को बैठक बोलाउनुभएको छ। सरकारले सामाजिक सञ्जाल बन्द गर्ने निर्णय गरेको भोलिपल्टै देशभर ‘जेन जेड’ पुस्ता सडकमा उत्रिएपछि प्रधानमन्त्रीले आकस्मिक बैठक बोलाउनुभएको हो।
बिज्ञापन
आज दिनभर काठमाडौंसहित विभिन्न शहरमा ‘जेन जेड’ युवाहरू आन्दोलनमा उत्रिएका छन्। उनीहरूले सामाजिक सञ्जाल बन्द गर्ने निर्णय फिर्ता लिन सरकारसँग माग गर्दै प्रदर्शन गरेका थिए। आन्दोलनमा विद्यार्थी, युवा र सामाजिक सञ्जाल प्रयोगकर्ताहरू सक्रिय रूपमा सहभागी भएका छन्।
बिज्ञापन
युवाहरूको सडक आन्दोलनसँगै प्रमुख प्रतिपक्षी नेपाली कांग्रेसले पनि सरकारमाथि दबाब बढाउन थालेको छ। कांग्रेस सभापति शेरबहादुर देउवाले प्रधानमन्त्री ओलीसँग प्रत्यक्ष सम्पर्क गर्दै विवादास्पद निर्णय तत्काल फिर्ता लिन आग्रह गर्नुभएको छ।
स्रोतका अनुसार आजको मन्त्रिपरिषद् बैठकमा जेन जेड पुस्ताले सुरु गरेको आन्दोलन, कांग्रेसको दबाब, सामाजिक सञ्जाल बन्द गर्ने निर्णयबारे पुनर्विचार गर्ने कि नगर्ने भन्ने विषयमा गम्भीर छलफल हुने जनाइएको छ। साथै, बैठकमा अन्य समसामयिक राजनीतिक र प्रशासनिक एजेन्डामाथि पनि विचार हुने बताइएको छ।
