कुखुरा खान जानेका स्यालहरू
यस्तै हुन् यहाँका
भर्याङ, ढोका र झ्यालहरू
हिजो उता आज यता
भेट हुनासाथ मारामार गर
लड, बाझ, मारकाटै गर
यही सिक
अरूलाई पनि यही सिकाऊ
अरू के जान्दछन् र ?
ती सब वाइयात हुन्
पृथ्वीका भार
तिम्रा लागि मात्र हो
यो रमणीय सुन्दर संसार
भगवानको उपहार !
भर्याङ तिम्रै लागि
ढोका तिम्रै लागि
झ्याल समेत तिम्रै लागि
सारा यी प्राणी तिम्रै लागि बाँचीरहेछन् !
तिमीलाई
कुइन्टलका कुइन्टल फूलमाला लाउन!
अबिर निधारभोरि धसाउन
आफ्नो भान्साको आगो निभाएर
वाली खाइरहेको
बाख्रालाई त्यत्तिकै छोडेर
झारले ढाकेको वालीलाई
नगोडेर
धुलामैला कपडा नधोएर
घरका सारा समस्या र
तनावसँग लड्न नसकी
दिनदिनै रोएर
खाने अनाजको अभावमा
भोकभोकै बसेर
हामी साराका सारा
यी यावत कष्ट सहेर
जस्तो जस्तो हुन्
तिमी हामिलाई आह्वान गर्छौ
ती सारा
तिम्रा आदेशलाई शिरोपर गर्दै
तिम्रै लागि चाहिने
भर्याङ निर्माण गर्न
सक्दा राम्रा राम्रा ढोका त
नसक्दा,
झ्यालै भएपनि
तिमी सजिलै छिर्ने
अरूलाई सदा रोक्ने
ती साराका सारा
तिम्रा लागि बनून्!
सुन्दर बनून्!
कलात्मक बनून्!
कुखुरा खान जानेका स्यालहरू
यस्तै हुन् यहाँका
भर्याङ , ढोका र झ्यालहरू!
बिज्ञापन
