बिज्ञापन

बिज्ञापन

क्यान्टिनको गुणस्तर खस्किँदै गएपछि अस्पतालमा कार्यरत आधाभन्दा बढी कर्मचारी खाजा खान नजिकै रहेको नापी कार्यालयको क्यान्टिनमा धाउन बाध्य भएको बताइएको छ। कर्मचारीहरूका अनुसार करिब दुई वर्षअघि पनि क्यान्टिनको खानाबाट यस्तै खराब अनुभव भोग्नुपरेको थियो। त्यसपछि पनि अवस्थामा अपेक्षित सुधार नआएपछि धेरैजसो कर्मचारी अस्पतालकै क्यान्टिनमा खाजा खान छाडेर बाहिर जान बाध्य भएका छन्।
‘अस्पतालभित्रै रहेको क्यान्टिनमा गुणस्तरीय र स्वच्छ खाना पाइने अपेक्षा हुन्छ। तर पटक–पटक समस्या दोहोरिँदा कर्मचारीहरू नै बाहिर गएर खाना खानुपर्ने अवस्था आएको छ,’ एक कर्मचारीले भने।

कर्मचारीहरूले क्यान्टिनको तत्काल अनुगमन गरी खाद्य पदार्थको गुणस्तर, सरसफाइ, भान्साको अवस्था तथा सञ्चालन मापदण्डको परीक्षण गर्न माग गरेका छन्। सम्बन्धित निकायले तत्काल ध्यान दिएर क्यान्टिनको अनुगमन तथा आवश्यक कारबाही गर्दै गुणस्तर सुधार गर्नेमा आफूहरू आशावादी रहेको उनीहरूको भनाइ छ।
तर खाद्य गुणस्तर तथा उपभोक्ता अधिकारको नियमन गर्ने वाणिज्य, आपूर्ति तथा उपभोक्ता संरक्षण विभाग र काठमाडौं महानगरपालिका जस्ता निकायको प्रभावकारी उपस्थिति नदेखिएको कर्मचारीहरूको गुनासो छ। अस्पतालजस्तो सार्वजनिक स्वास्थ्य संस्थाभित्रै खाद्य स्वच्छताको गम्भीर समस्या देखिँदा पनि नियामक निकाय मौन बसेको उनीहरूको आरोप छ।

अस्पतालमा उपचारका लागि आउने बिरामी, बिरामीका आफन्त तथा कर्मचारीले प्रयोग गर्ने क्यान्टिनको खानाको गुणस्तरमा कुनै सम्झौता हुन नहुने कर्मचारीहरूको माग छ। उनीहरूले तत्काल अनुगमन गरी दोषी देखिए कारबाही र क्यान्टिनको सेवा तथा खाद्य गुणस्तर सुधार गर्न सम्बन्धित निकायसँग आग्रह गरेका छन्।
खानामा किरा भेटिएको घटनाले अस्पतालको क्यान्टिन व्यवस्थापन र नियमन प्रणालीमाथि समेत प्रश्न उठाएको छ। अब सम्बन्धित निकायले घटनाको छानबिन गरी क्यान्टिन सञ्चालकलाई जिम्मेवार बनाउँछ वा विगतमा झैँ घटना सामान्य रूपमा टारिन्छ भन्ने विषय चासोको विषय बनेको छ।