बिज्ञापन

बिज्ञापन

कितावखानाले वर्तमान सरकारले अघि सारेको सार्वजनिक सेवा प्रवाहको अवधारणालाई आत्मसात गर्दै आफ्ना सबै सेवालाई विद्युतीय प्रविधिमार्फत भौतिक उपस्थितिविनै उपलब्ध गराउने व्यवस्था मिलाएको जनाएको छ। सुगमदेखि दुर्गम, तराईदेखि हिमालपारिका जिल्लासम्मका सेवाग्राहीले कार्यालय धाउनुपर्ने बाध्यता हटाउँदै ‘फेसलेस सेवा’ प्रणाली सफलतापूर्वक कार्यान्वयन गरिएको दाबी गरिएको छ।

केही महिनाअघि विभागीय मन्त्री प्रतिभा रावलको उपस्थितिमा राष्ट्रिय कितावखानाका सबै सेवा भौतिक उपस्थितिविनै प्राप्त गर्न सकिने गरी पूर्ण रूपमा विद्युतीय प्रणालीमा रूपान्तरण भएको औपचारिक घोषणा गरिएको थियो।

राष्ट्रिय कितावखानाका अनुसार २०८२ साल चैत ८ गतेदेखि सुरु गरिएको ई-पेन्सन सेवा हालसम्म ५६२ जना निवृत्त कर्मचारीले उपयोग गरिसकेका छन्। यो संख्या सो अवधिमा पेन्सन सेवा लिने कुल ६९९ जनामध्ये करिब ८० प्रतिशत हो। बाँकी करिब २० प्रतिशत सेवाग्राही भने अझै पनि प्रत्यक्ष रूपमा कार्यालयमै उपस्थित भएर सेवा लिइरहेका छन्।

ई-पेन्सन सेवा राजधानी वा सुगम जिल्लामा मात्र सीमित नरही ताप्लेजुङ, सोलुखुम्बु, मनाङ, मुस्ताङ, हुम्ला, जुम्ला, कालिकोट र दार्चुलालगायत दुर्गम जिल्लाका निवृत्त कर्मचारीले समेत उत्साहपूर्वक उपयोग गरिरहेको राष्ट्रिय कितावखानाले जनाएको छ।

राष्ट्रिय कितावखानाले ई-पेन्सन सेवाले समय, खर्च र झन्झट घटाउनुका साथै सार्वजनिक सेवा प्रवाहलाई थप पारदर्शी, सरल र प्रभावकारी बनाएको जनाएको छ। आगामी दिनमा बाँकी सेवाग्राहीलाई समेत विद्युतीय माध्यमबाट सेवा लिन प्रोत्साहित गर्दै सम्पूर्ण सेवा पूर्ण रूपमा डिजिटल प्रणालीमार्फत सञ्चालन गर्ने लक्ष्य रहेको पनि कितावखानाले जनाएको छ।