रसुवा — मानवीय सेवाका लागि प्रयोग हुनुपर्ने एम्बुलेन्सलाई तस्करीको माध्यम बनाएको घटना रसुवामा सार्वजनिक भएको छ। प्रहरीले करिब ७० लाख रुपैयाँभन्दा बढी मूल्य बराबरका चिनियाँ चुरोटसहित चार जनालाई नियन्त्रणमा लिएको छ।
बिज्ञापन
जिल्ला प्रहरी कार्यालय रसुवाका अनुसार २०८२ चैत ६ गते साँझ करिब ८ बजे उत्तरगया गाउँपालिका वडा नं. ५ बेत्रावतीस्थित पासाङ ल्हामु राजमार्ग सडकखण्डमा प्रहरी चौकी बेत्रावतीबाट खटिएको प्रहरी टोलीले शंकास्पद रूपमा गुडिरहेको एम्बुलेन्सलाई रोकेर जाँच गरेको थियो।
बिज्ञापन
जाँचका क्रममा बागमती प्रदेश ०१००२ झ ७४२६ नम्बरको एम्बुलेन्सभित्र ठूलो परिमाणमा अवैध चिनियाँ चुरोट फेला परेको प्रहरीले जनाएको छ। प्रहरीका अनुसार ‘होर्मोनाइजेसन’ लेखिएको ३ हजार ९४० बट्टा चिनियाँ चुरोट बरामद गरिएको छ, जसको अनुमानित बजार मूल्य ७० लाख ९२ हजार रुपैयाँ रहेको छ।
प्रहरीले उक्त एम्बुलेन्ससहित चार जनालाई नियन्त्रणमा लिएर थप अनुसन्धान सुरु गरेको जनाएको छ। प्रारम्भिक अनुसन्धानले एम्बुलेन्सलाई आवरण बनाएर ठूलो परिमाणमा चुरोट तस्करी गर्ने प्रयास भएको संकेत गरेको छ।
बिज्ञापन
सामान्यतया बिरामी बोक्न प्रयोग गरिने एम्बुलेन्सलाई अवैध कारोबारको माध्यम बनाइएको घटनाले सुरक्षा संयन्त्रलाई पनि गम्भीर बनाएको छ। यस घटनाले सीमावर्ती क्षेत्र हुँदै हुने अवैध तस्करी अझै नियन्त्रणबाहिर रहेको प्रश्न पनि उठाएको छ।
प्रहरीले एम्बुलेन्ससहित चार जनालाई नियन्त्रणमा लिएको छ। पक्राउ पर्नेहरूमा रसुवा आमाछोदिङमो गाउँपालिका वडा नं. ३ घर भएका ४३ वर्षीय एम्बुलेन्स चालक दावा नुर्पु तामाङ,सोही गाउँपालिका वडा नं. ५ घर भएका २७ वर्षीय मार्कुस तामाङ,३२ वर्षीय सुशिल तामाङ, तथा ३६ वर्षीया सुनिता तामाङ रहेका छन्।
प्रहरीका अनुसार एम्बुलेन्सलाई आवरण बनाएर ठूलो परिमाणमा चिनियाँ चुरोट ओसारपसार गर्ने प्रयास गरिएको प्रारम्भिक अनुसन्धानबाट देखिएको छ। मानवीय सेवाका लागि प्रयोग गरिने एम्बुलेन्सलाई अवैध कारोबारका लागि प्रयोग गरिएको घटनाले सीमावर्ती क्षेत्रमा हुने तस्करीको जालो अझै सक्रिय रहेको संकेत गरेको छ।
नियन्त्रणमा लिइएका व्यक्तिहरूमाथि आवश्यक कानुनी प्रक्रिया अघि बढाइएको र घटनाबारे थप अनुसन्धान जारी रहेको प्रहरीले जनाएको छ।
