प्रमुख प्रशासकीय अधिकृतको सरुवामा विचौलिया हाबी हुने गरेको प्रति सामान्य प्रशासन मन्त्री भानुभक्त जोशीले चिन्ता प्रकट गरेका छन् । कर्मचारी जसलाई स्थायी सरकार । तर, यही स्थायी संयन्त्रलाई राजनीतिक दल तथा विचौलियाहरुको स्वार्थ अनुसार भकुण्डो बनाएको भेटिन्छ । कर्मचारी सरुवा नियमित प्रक्रिया भए पछि व्यापारी,ठेकेदारदेखि व्यवसायीका स्वार्थसँग मेल खाने कर्मचारी लामो समय एउटै अड्डामा टिक्न सफल हुने अनि व्यापारी,दलाल,विचौलियाहरुप्रति अलि आक्रामक ढंगले काम गर्ने खोज्ने हाकिमहरु छिटो छिटो फालिने रोग केन्द्रको सिंहदरबारदेखि गाँउकै सिंहदरबारसम्म देखिन्छ ।

बिज्ञापन

यस्तै पीडा र चिन्ता पोखेका छन्,संघीय मामिला तथा सामान्य प्रशासन मन्त्री भानुभक्त जोशीले । गाउँपालिका राष्ट्रिय महासंघले ललितपुरमा आयोजना गरेको परिषद् बैठक तथा वित्तीय संघीयता कार्यान्वयन सम्बन्धी कार्यक्रममा उनले प्रमुख प्रशासकीय अधिकृतहरुले विचौलियालाई लजमा राखेर सरुवाका लागि भनसुन गर्ने गरेको बताएका छन् । प्रमुख प्रशासकीय अधिकृतको हेरफेर र सरुवामा विचौलियाहरु हाबी हुने गरेको उल्लेख गर्दै जनप्रतिनिधिलाई यस्तो विकृति हटाउन सहयोगको अपिल गरे ।