काठमाडौँ । संघीय निजामती सेवा विधेयक पास गर्ने विषयमा राष्ट्रिय सभाभित्र अन्तिम घडी नजिकिँदैछ । सोमबार बिहान साढे ११ बजेदेखि दिउँसो साढे २ बजेसम्म बसेको विधायन व्यवस्थापन समितिको बैठकमा छलफल भए पनि सहमति जुट्न सकेन ।
बिज्ञापन
बैठकपछि समितिकी सभापति तुलसा कुमारी दाहालले भोलिसम्म विधेयक पारित गर्ने प्रतिवद्धता जनाइन् । उनले भनिन्, “आज कुरा नमिले पनि भोलि बिहान ९ बजे बस्ने बैठकमार्फत विधेयक पारित गर्नेछौं ।”
बिज्ञापन
यो विधेयक यसअघि प्रतिनिधि सभाबाट पारित भएर १५ असारमा राष्ट्रिय सभामा पुगेको थियो । संविधानको धारा १११ को उपधारा ५ अनुसार राष्ट्रिय सभाले प्रतिनिधि सभाबाट प्राप्त विधेयक दुई महिनाभित्र पारित गर्न वा सुझावसहित फिर्ता पठाउनुपर्ने व्यवस्था छ ।
नियत समयसीमा भोलि सकिँदैछ । यदि राष्ट्रिय सभाले भोलिसम्म विधेयक पारित नगरे वा फिर्ता नगरे प्रतिनिधि सभाले नै निर्णय गरेर विधेयक प्रमाणीकरणका लागि राष्ट्रपति समक्ष पठाउन सक्ने संवैधानिक व्यवस्था छ ।
बिज्ञापन
यसर्थ, राष्ट्रिय सभाभित्रको भोलिको बैठक संघीय निजामती सेवा विधेयक पारित गर्ने निर्णायक अवसर मानिएको छ ।
