बिज्ञापन

बिज्ञापन

गत भदौ ११ गते भएको कार्यक्रममा नवगठित आइपिपी गभर्निङ वोर्डका पदाधिकारी, स्थानीय सरकारका प्रतिनिधि, नेपाल आदिवासी जनजाति महासंघ जिल्ला शाखा, नेपाल वाटर एण्ड इनर्जी डेभलप्मेन्ट कम्पनीका प्रतिनिधि तथा स्थानीय समाजसेवीहरू सहभागी रहेका थिए । अन्तरक्रियाको सहजीकरण महासंघका जिल्ला अध्यक्ष लाक्पा तामाङले गर्नुभएको थियो ।

हालै पुनर्गठित आइपिपी गभर्निङ वोर्डको अध्यक्षमा थाङ्कु गाउँका मानबहादुर तामाङ निर्वाचित भएका छन् । वरिष्ठ उपाध्यक्षमा विजय तामाङ, उपाध्यक्षमा मिङमार तामाङ, महासचिवमा पासाङ मेन्दो तामाङ, सचिवमा सुब्बा तामाङ र कोषाध्यक्षमा फुलीमाया तामाङ चयन भएका छन् ।

अध्यक्ष मानबहादुर तामाङले कार्यक्रममा आफ्नो कार्यकालमा समुदायको हकहितको संरक्षण, पारदर्शिता र प्रभावकारी योजना कार्यान्वयनलाई प्राथमिकता दिने प्रतिवद्धता व्यक्त गर्नुभयो । साथै आइपिपी कार्यान्वयनमा नवगठित टिमले विशेष भूमिका निर्वाह गर्ने र आयोजनाको निर्माण कार्यलाई सहज बनाउन स्थानीय तर्फबाट आवश्यक सहयोग गर्ने आश्वासन दिनुभयो ।

उत्तरगया गाउँपालिका वडा नं १ का अध्यक्ष मारसिङ तामाङ, आमाछोदिङमो गाउँपालिका वडा नं १ का अध्यक्ष साङलामा तामाङ र वडा नं २ का अध्यक्ष लाक्पा कामी तामाङले आइपिपीले आदिवासी समुदायलाई राम्रो सहयोग पु¥याएको उल्लेख गर्दै आगामी दिनमा स्रोतहरूको प्रभावकारी र पारदर्शी व्यवस्थापन गरेर उदाहरणीय काम गर्नुपर्नेमा जोड दिनुभयो ।

माथिल्लो त्रिशूली–१ आयोजनाले सन् २०७५ कात्तिकमा आदिवासी तामाङ समुदायलाई भाषा, धर्म, संस्कृति, प्राकृतिक स्रोतको संरक्षण, ग्रामीण समुदायको विकासलगायतका उद्देश्यका लागि करिब १४ करोड रुपैयाँ दिने त्रिपक्षीय सहमति गरेको थियो । सो सहमतिअनुरूप हाल निर्देशिका तयार भई आइपिपी कार्यान्वयनको चरण सुरु भएको हो ।

रसुवाका १३ प्रभावित गाउँबाटै प्रतिनिधित्व हुने गरी गठित आइपिपी गभर्निङ वोर्ड परिचालनमा आइसकेको छ । उक्त वोर्डमार्फत स्रोतमा समान पहुँच र समावेशी विकास हुने अपेक्षा गरिएको छ ।