अख्तियार दुरुपयोग अनुसन्धान आयोगले नापी कार्यालय भैरहवा, रुपन्देहीका नापी अधिकृत सुग्रीव यादवविरुद्ध पाँच करोड ७९ लाख रुपैयाँभन्दा बढीको गैरकानूनी सम्पत्ति आर्जन गरेको अभियोगमा विशेष अदालत काठमाडौंमा आरोपपत्र दायर गरेको छ।
बिज्ञापन
आयोगका अनुसार यादवले २०५३ सालदेखि २०८१ साल असार १६ गतेसम्म सार्वजनिक पदमा रहेर वैध आयका स्रोतहरूबाट जम्मा करिब नौ करोड रुपैयाँ मात्र आर्जन गरेका भए पनि सोही अवधिमा करिब १४ करोड ८३ लाख रुपैयाँ बराबरको खर्च तथा लगानी गरेका देखिएका छन्। सोही आधारमा यादवले पाँच करोड ७९ लाख ६२ हजार रुपैयाँभन्दा बढी गैरकानूनी सम्पत्ति आर्जन गरेको ठहर भएको हो।
बिज्ञापन
उनीमाथि दशकौँसम्म राजनीतिक पहुँच र विभागीय चलखेलमार्फत “निमित्त प्रमुख नापी अधिकृत”को पदमा रहँदै सार्वजनिक जग्गा व्यक्तिको नाममा पार्ने, प्लट मिलान गर्ने नाममा करौडौंको आर्थिक चलखेल गर्ने जस्ता आरोपसमेत रहेका छन्।
यादवको गैरकानूनी सम्पत्ति श्रीमती गायत्री यादव, छोराहरु सुधान्सु यादव र शुभम यादवका नाममा समेत खरिद भएको ठहर भएकाले उनीहरूलाई पनि प्रतिवादी बनाइ आरोपपत्र दायर गरिएको आयोगले जनाएको छ। आयोगले सो सम्पत्ति जफत गरी बिगो असुल उपर गर्न मागदाबीसमेत गरेको छ।
