धनी धन थुपार्छ निरन्तर
लुटेर
धुतेर
र चुसेर
हामी गरिब /हामी परिश्रमी
लुटिन्छौ
धुतिन्छौ
र चुसिन्छौ पनि
हाम्रै पसिनाको आहालमा पौडदै
साहु महाजन हाम्रै ढाड सेकी
हामीलाई नै दास बनाउदा रहेछन ।
नाना, खाना र छाना भित्र
किन रुमलिन्छ जिन्दगी ?
भोक नलाग्नु पथ्र्याे
भोको पेटमा सारङ्गी बज्छ किन ?
जाडो नहुनु पथ्र्याे
नाङ्गो आङ्मा सिरेटोले हान्छ किन ?
बास नबस्नु पथ्र्यो
तुषारोले लछ्रप्पै भिजाउँछ किन ?
परिस्थितिले नराम्ररी चुट्यो सन्ते
आफ्नै देश भित्र
शरणार्थी बनाइएको छ
कर्मको फलमा भुलाएर
गरिबीलाई पूर्व जन्मको कमाई सम्झि
परम्परा देखि भ्रम पाल्दै
सामन्तहरुको जि हजुरी गर्न लगाइए छ ।
घरबारी साहुलाई सुम्पिएर
विदेशिनुको पीडा
बिर्सन कहाँ सकिन्छ र शनी माया ?
आफ्नै देशको माटो बिरानो बनाई
सात समुद्र तर्ने रहर कसलाई होला र ?
भैरे
बिरानो मुलुक बाट सम्झन्छु
मेरो देश
देशको माटो के भै रहेछ ?
गाउँ पाखा पखेरा र चौतारीहरुमा
गीत गुञ्जदैनन होला अचेल
उदास होलान चौतारीहरु
चौतारीमा बटुवा नभए पछि
सानु माया
कसले पो गीत गाउँदो हो र ?
गोठालाहरुले गीत नगाए पछि
देशको माया हामीलाई मात्रै लाग्नु पर्ने
राष्ट्रियतालाई शिरमा राखी
देशभक्तिको गीत हामीले मात्रै गाउँनु पर्ने
गीत गाउँनु अन्यथा हैन भने
हामी किन हिरासत बस्नु पर्ने ?
जवाफ पाउँ महोदय
देशको माया अपराध हो र ?
लुटुनेहरु
लुटिरहेछन
धुत्नेहरु
धुतिरहेछन
देशको माया के थाहा तिनीहरुलाई ?
देश बलात्कृत भै सक्यो
तिनीहरु त लेण्डुप दोर्जे जस्तै छन ।
न सानीले गुन्यु फेर्न सकी
न ठुलेले बाँसुरी बजाउनै पायो
न कान्छीले पिङ खेल्नै पाई
सुरक्षाको नाममा
न आमाले सुरक्षित ओत नै पाइन
समय निर्लज्ज हाँसि रहयो
तिनीहरुको दुःखमा पनि ।
सामन्तहरु
हाँसि रहेछन खित्का छोडेर
रमाइ रहेछन बुकर्सी मारेर
गरिबहरुको रगतमा होली खेल्दै
देशलाई बर्वाद पारी
देश लुटिरहेछन
देशद्रोही लुटाहाहरु ।
धनी र गरिब बिचको खाडल पुर्नु पर्ने
लैङ्गिक असमानता हटाई
जातीय उत्पीडन तोड्नु पर्ने
भूई मान्छेको कथा लेख्दै
क्रान्तिको शङख घोष गर्नु पर्ने
हामी त दश नङ्ग्रा खियाइ रहेछौ
हामी त पसिना बगाइ रहेछौ
उठ श्रमिक, किसान, मजदुरहरु
यसपालि क्रान्तिकारी होली खेल्नु पर्ने
भोका नाङ्गा सबै जुटी
नौलो क्रान्ति गर्नु पर्ने
जनवादी गीत गाउँदै गर्नु
साम्यवादमा उँचो निचो हुँदैन रे
म साम्यवाद लिएर आउँला ।
सुन्दरहरैचा–०६, दुलारी मोरङ
९८४२०७३५२५
Email : [email protected]
बिज्ञापन
बिज्ञापन
