गृहमन्त्री रमेश लेखकका निजी सचिव फेरिएका छन् । हालसम्म निजी सचिवका रूपमा कार्यरत उपसचिव बद्रीप्रसाद तिवारीलाई म्याग्दी जिल्लाको प्रमुख जिल्ला अधिकारी (सिडिओ) का रूपमा खटाइएपछि उनको स्थानमा उपसचिव दिर्घराज उपाध्यायलाई नयाँ निजी सचिवको जिम्मेवारी दिने निर्णय गरिएको हो।
बिज्ञापन
उपसचिव तिवारीलाई सरुवा निर्णयसँगै म्याग्दी पठाइएको छ भने उपसचिव दिर्घराज उपाध्यायलाई मन्त्रालयमा ल्याएर गृहमन्त्रीको निजी सचिवको जिम्मेवारी दिइएको हो। सहज र इमान्दार अधिकारीको छवि बनाउन सफल उपाध्याय यसअघि बैतडी र दार्चुला जिल्लामा प्रमुख जिल्ला अधिकारीका रूपमा काम गरिसकेका छन्। जिल्ला प्रशासनमा रहँदा उनले स्थानीय प्रशासनलाई चुस्त-दुरुस्त बनाउन सक्रियता देखाएका थिए। स्थानीय तह र सुरक्षासम्बन्धी निकायसँग समन्वय गरी जनतालाई सहज सेवा प्रवाहमा योगदान गरेको उनको अनुभव रहेको बताइन्छ।
बिज्ञापन
गृहमन्त्रीको निजी सचिवालय सरकारका दैनन्दिन निर्णय प्रक्रिया, नागरिक सरोकारका विषय, सुरक्षासम्बन्धी समन्वय र गृह मन्त्रालयभित्रका प्रशासनिक कामकाजमा महत्वपूर्ण मानिन्छ। उपाध्यायले यसअघि जिल्लामा देखाएको नेतृत्व क्षमता मन्त्रालयमै प्रभावकारी हुने अपेक्षा राखिएको मन्त्रालय स्रोतले जनाएको छ।
यस सरुवासँगै गृह प्रशासनमा फेरि एकपटक नयाँ अनुहार देखिएको छ।
