बिज्ञापन

बिज्ञापन

अख्तियार दुरुपयोग अनुसन्धान आयोगका प्रवक्ता राजेन्द्र कुमार पौडेलका अनुसार, अनुसन्धानमा यादवले २०६६ साल जेठ २४ गतेदेखि २०७९ साल साउन २९ गतेसम्मको अवधिमा वैधानिक आय स्रोतभन्दा बढी सम्पत्ति आर्जन गरेको पाइएको हो। सो अवधिमा यादव र उनको एकाघर परिवारले पारिश्रमिक, भ्रमण भत्ता, जीवन बीमा रकम, हिमाल आरोहण सम्पर्क अधिकृत भई प्राप्त रकम, परामर्श शुल्क, घरबहाल, बैठक भत्ता, कृषि आम्दानी, जग्गा बिक्री, बैंक ब्याज तथा शेयर बिक्रीबाट गरी कुल रु. २,६८,१८,९००.७२ आर्जन गरेको देखिएको आयोगको दाबी छ।

तर, सोही अवधिमा यादवको खर्च तथा लगानी रकम रु. ३,६५,०४,४५३.९१ रहेको र यसअनुसार रु. ९६,८५,५५३.१९ बराबरको सम्पत्ति स्रोत पुष्टि हुन नसकेको आयोगले जनाएको छ। आयोगका अनुसार, यादवले आफ्नो पदीय हैसियत दुरुपयोग गरी अमिल्दो र अस्वाभाविक उच्च जीवनस्तर यापन गरेको प्रमाणित भएको छ।

आरोपपत्रमा भ्रष्टाचार निवारण ऐन, २०५९ को दफा २० को उपदफा (२) बमोजिम कैद सजाय र बिगो बराबर जरिवाना, सोही ऐनको दफा ४७ तथा अख्तियार दुरुपयोग अनुसन्धान आयोग ऐन, २०४८ को दफा २९ख. बमोजिम गैरकानूनी सम्पत्ति जफत गर्न माग गरिएको छ। साथै, यादवले आफ्नो पत्नी आशा कुमारी यादवको नाममा सम्पत्ति राखेको देखिएकाले उनीमाथि पनि सम्पत्ति जफत गर्ने प्रयोजनका लागि प्रतिवादी कायम गरिएको आयोगले जनाएको छ।